Mizoram CEO hovin State Steering Committee for Accessible Election (SSCAE) thutkhawm neih a ni

State Steering Committee for Accessible Election (SSCAE) chu nimin khan an Chairman leh Chief Electoral Officer, Mizoram Madhup Vyas IAS hova thukhawmin an hmalakna hrang hrang an thlirho.

Mizoram CEO Pisa-a he thutkhawm neih ah hian CEO Madhup Vyas chuan mitin banphak leh kalpawh theih inthlanna nei tura District hrang hranga thahnemngai taka hmalak a ni chu lawmawm a tih thu a sawi a. Polling Station tina Vohbik, PwD Voter awmte chhinchhiah leh a tul anga ngaihven zel te, harsatna an tawh loh nana hmalakte leh anmahni buaipui kawnga tulte inzirtirna buatsaihte chu ngaihpawimawh tur a nih thu a sawi a ni.

He hunah hian Social Welfare, Tribal Affairs, Women & Child Development Director Dr. Lalhriatzuali Ralte IAS chuan September ni 27 atanga October ni 13, 2023 chhunga PwD te puala Assessment & Certification Camp buatsaih dan tarlangin, District 11-a khaw 26-ah Assessment & Certification Camp neih a nih thu a sawi a. Heng Camp kaltlang hian Electoral Roll-a chuang PwD 2031, Assessed PwD 1129, Assessed PwD Medical Board pawmpui ngai 564, Camp atanga Voter Certified 688 leh kum 18 chunglam UDID hnuaia mi 3947 te an tel a ni.

Mizoram Deputy CEO leh SSCAE-a Member Secretary Henry C. Lalrawnkima chuan he hunah hian SSCAE hmalakna te a tarlang a. Inthlanna hlawhtling siam kawnga PwD voter-te tana ruahmanna felfai tak siam chu thil tih makmawh tak a nih thu tarlangin, District Election Officer te hmalaknaa checklist bawhzui dan turte sawiho niin ngenna siam ni se an ti a. PwD Assessment Camp-a tel an tam zawk theih nana hmalak tulte ngaihtuah niin, District Steering Committee on Accessible Election (DSCAE) thutkhawm tum hnih tal neih a tul thu tarlan a ni a. PwD te tana In lama vote thlak theih dan turte, an puala Special Awareness Campaign buatsaih chungchangte, Polling Personnel-te training huna Sign Language telhte bakah PwD Voters record kimchang siam dan turte an rel bawk a ni.