Cancer Early Detection Drive kalpui tura hmalakna beisei anga hlawhtling lo pawi tih thu sawi

Mizoram Legislative Assembly Speaker Lalrinliana Sailo chuan Cancer enkawlna kawngah natna hmuhchhuah hma a pawimawh thu sawiin, hemi atana Early Detection Drive kalpui tura hmalakna chu beisei angin a hlawhtlin loh avanga pawi a tih thu a sawi.

National Legislators Conference hmanga Mumbai-a zin Assembly Speaker Lalrinliana Sailo hian Inrinni khan Mumbai Mizoram House tlawhin helai hmuna damlo awm mek te nen inkawmna an nei a, kum 2005-ah Mumbai Mizoram House hawn a lo ni tawh chu hruaitu hmasa ten theihtawp an lo chhuah vang a ni tih Speaker chuan sawiin, ram tana an thahnemngaihna chu chhuanawm a tih thu a sawi a. Mizoram-ah Cancer vei an tam avangin Health Minister a nih laiin Cancer vanga thihna tihniam turin theihtawp chhuah a nih thu leh hemi atan Cancer tamna ram Japan-ah Mizo Surgeon 2 tirh an nih thu a sawi a. An lo haw hnuah Cancer phai-a thawn pawh nasa takin a tlahniam tih sawiin, Cancer enkawlna kawngah natna hmuhchhuah hma a pawimawhin hemi atana Early Detection Drive kalpui tura hmalakna chu beisei angin a hlawhtlin loh avanga pawi a tih thu pawh a tarlang a ni.

Assembly Speaker chuan Mumbai Mizoram House hnathawkte chu damlote tana an inpekna leh Mumbai-a Mizo awm ten harsatna an tawh changa an buaipui thin danah fakawm a tih thu sawiin, Mi lian leh mi te thliar lova damlo te an hmasak dan indawta accomodation pek an ni thinte chu tha a tiin, mite tana malsawmna lo ni zel turin a chah a. Damlo te tan a tul tula hman atan Damlo Welfare Committee hruaitute hnenah Rs. 30,000/- a hlan nghal bawk.

Mumbai Mizoram House a tlawhna ah hian Speaker hi Dy. Resident Commissioner H. Lalruatliana chuan lo dawngsawngin Speaker in House a tlawh avangin lawmthu a sawi a. Mumbai Mizoram House dinhmun leh accomodation indaihlohna avanga harsatna an neih te, helai building-a cheng ve hnamdang te leh Mizote inkara harsatna neih thinte Speaker hnenah hian a lo thlen a ni. He hunah hian Speaker hi MLA leh Official mi pawimawh ten an tawiawm a ni.