Farkawn khuaa Phullem phah hawn a ni

Farkawn Public Playground-a Phullem (Astro/Synthetic Football Turf) phah thar chu nimin khan bialtu MLA Ramthanmawia chuan a hawng.

Special Assistance to States for Capital Expenditure (SASCE) Scheme sum cheng nuai 450 senga Farkawn Public Playground-a Phullem phah hawnna hunah hiaan bialtu MLA chuan hripui leng avanga harsatna hrang hrang tawh karah Sawrkarin hmasawnna ruhrel pawimawhte ngaipawimawha a siam chhoh zel thu sawiin, Mizoram khawchhak kilkhawr taka awm Farkawn khaw Field-a phullem tha tak phah a nih theih nana Department, Contractor, khawtlang hruaitute, Tuipuiral Games & Sports Association leh mithahnemngaite inpekna fakawm a tih thu a sawi a. East Tuipui bial khaw dangah te pawh siam tuma ngaihtuahna sen a nih thu a sawi bawk.

He hunah hian khual zahawm Mizoram State Sports Council Secretary John Tanpuia chuan Farkawn Playground-a phullem phah thar a ni chu a lawmpui thu a sawi a. Infiamna ruhrelte chu awlsam taka neih mai theih a nih loh thu sawiin, Mizo infiammite khawvel puma lang tham tura tanpui leh mipui huapzo infiamna chawikan tum a nih thu a sawi bawk.

Farkawn Public Playground-a Phullem, Astro-turf phah hna hi M/s Mizoram Development Agency, Aizawl leh Decor India, Guwahati ten thawkin April ni 6, 2023 khan zawhfel a ni a. Project hnuaiah hian hna hrang hrang 4 thawh niin phullem phah bakah hian meter 2-a sangin Playground hi hung vek a ni a, mipui luh leh chhuahna tur Gate siam a nih bakah Field sir dawl ngheh nan leh Field zauh (extend) nan lungrem a nih bakah lei tawlh leh min mai thei dawl nan Toe Wall siam a ni bawk.

Comments

Popular News (Last 30 Days)

Vawiin-ah HSSLC Exam result

LPG man bithliah thar