Tuikum bialtu MLA in Golden Jubilee hmanpui

Tuikum bialtu MLA leh AH & Vety Minister Er. Lalrinawma chuan Tlungvel Primary School-III ten kum 50 an tlin lawmna chu nimin khan a hmanpui a. UCC chu Mizoram Assembly chuan an duh loh thu leh an pawm tih a sawi.

Tlungvel Venghlun Branch YMA Hall-a Govt Tlungvel Primary School-III Golden Jubilee lawmna hunah hian bialtu MLA chuan he School in kum 50 a tling ta chu lawmawm a tih thu sawiin, kum 50 chhunga zirlai tam tak a lo hrinchhuah tawhte chu khua leh ram tan thil tangkai tak a nih thu a sawi a, MLA a nih anga a ngaih pawimawh ber pakhatna chu zirna a nih thu a sawi bawk.

Uniform Civil Code (UCC) chungchang pawh sawiin AH&Vety Minister chuan BJP in UCC hman a tum chu Mizoram Assembly chuan an duh loh thu an pawm thu leh hei hi remna thuthlung tha tak kan neih vanga pass thei an nih thu a sawi a. Sawrkar laipui chuan an duh miau loh chuan tilui thei lo turin remna ah chanvo tha tak neiin inremna an ziak tih a sawi a, remna ziah vangin University te kan neih theih phah a, kan hnam humhim nan ILP te kan nei leh thei zel te hi a hlu em em a ni, a ti bawk.

Tlungvel Venghlun a awm Govt. Tlung-vel Primary School-III hi kum 1972-a din niin tunah hian thawktu 6 awm mekin zirlai 82 an nei mek a. Nimin-a an kum 50 tlin lawmna hi Jubilee Organising Committee Chairman F. Lalrohlua chuan kaihruaiin School Education Department-a Deputy Director R. Lalthanmawia chuan khual zahawm niin a hmanpui bawk a ni.