Nikum-ah kangmei vanga thi mi 15 an awm

Kum hlui (2022) chhung khan Mizoram-ah kangmei chhuak avangin mi 15-in nunna an chan a, mi 11 an hliam bawk.

Fire and Emergency Directorate-in an chhinchhiah danin nikum chhung khan khaw chhunga kangmei chhuak 34 leh ram kang 44 a awm a. Hetah hian mi 15 kanghlumin mi 11 an hliam a ni. Heng bakah hian Fire and Emergency Directorate a thawkte hian tanpui tura kohna chi dang dang vawi 50 an dawng bawk a, kangmei chhuak vanga In leh lo, bungrua leh thil dang chan hi Rs. 23,69,08,000/- hu anga chhut a ni a, kangmei an thelh theih avanga sum hum zat hi Rs. 19,28,23,000/- hu a chhut a ni bawk.

Nikum chhung khan March thla chhungin kangmei a chhuak tam ber a, khaw chhungah kangmei vawi 9 chhuakin ramkang 25 a awm a, thil dangah Fire and Emergency hnathawkte vawi 10 koh an ni bawk a ni. January thla-ah khaw chhunga kangmei chhuak vawi 7 a awm bawk a, April thla-ah ramkang vawi 9 a awm leh bawk a ni.