Mizoram District tinah BBBP kalpui tum a ni

Fanute venghima zirtir puitlin ngei a tulzia inzirtir nana sawrkar laipuiin ruahmanna a siam, ‘Beti Bachao Beti Padao’ chu Mizoram chhunga District tinah kumin hian beihpui thlak a ni dawn.

    Women and Child Development Asst. Director Lalrammawii Kawilam sawi dan chuan, he beihpui thlaknaah hian Department chuan hmun hrang hrangah mipui hnena zirtirna pek a tum a. District thlur bik zing ami District Hospital a hmeichhe naupang piangte chu lawmman pek an ni dawn a, hetah hian Department a mithiamte leh khawtlanga hmeichhiate an thawkho ang a, hmeichhe naupang pawimawhna sawihona te buatsaih a ni thin bawk anga, khawtlang hruaitu, tlawmngai pawl hrang hrang, Kohhran hruaitute leh khawtlanga pawl hrang hrangte hnenah BBBP hrilhhriatna neih thin a ni bawk ang.

Beti Bachao Beti Padao hi kum 2015 khan Mizoram chhunga District 3 - Aizawl, Serchhip leh Lawngtlai-ah te kalpui tan a ni a, kumin atang hian District dangah pawh kalpui tan tum a ni bawk.