Bangladesh atanga Zohnahthlak rawn luh tumte tawrhna hriatpuina hun hman a ni dawn
Kar kalta Ningani khan Central YMA-a Central Executive Committee (CEC) chu thukhawmin Bangladesh ram buaina avanga mahni sahimna zawnga Mizoram, India a lo lutte’n harsatna an tawh chungchang hi an sawiho a, Aizawl Raj Bhavan Hmar lam Gate bula thutkhawm neih an rel rualin Sub-Hqrs. YMA te pawh nei tura beisei an ni a. Thih leh dam kara leng, mahni himna tur ni a ngaia India ram rawn pante’n ramri-a harsatna an tawk thin chu YMA chuan pawi a ti tih sawiin, mihringte dikna chanvo hre reng chunga lo dawngsawng turin India Sawrkar a ngen a. Sahimna zawnga lo lutte mamawh, ei leh bar, mut lumna leh chenna turte ngaihtuah sak turin India Sawrkar a ngen bawk a ni.
Serchhip Sub-Hqrs. YMA pawhin Inrinni khan SEC thutkhawm hmanhmawh nei nghalin hemi chungchang hi an sawiho a, Bangladesh atanga raltlan rawn lut te chungchanga Central YMA hmalakna ang hian Vawiin chhun dar 12:00 hian Serchhip IOC Veng-a DC Office Peng ah thutkhawm (Sitting Demonstration) hi neih turin ruahmanna siam a ni a, he hunah hian Serchhip Sub-Hqrs. YMA hruaitute bakah Bangladesh Raltlan Relief Committee hruaitu ten thu an sawi dawn bawk a ni.
Bangladesh Chittagong Hill Tracts-a Kuki-Chin National Army (KNA) ten thuneihna sang zawk an ngiat vanga buaina thleng vanga Bangladesh atanga sahimna zawnga Lawngtlai District chhunga rawn lut hi mi 372 an tling tawh a. Kum kalta November 20, 2022 khan Raltlan 274 chuan Parva-III thlengin hemi hnu hian tum li rawn an rawn lut tawh a, Ningani khan mi 45 rawn lut lehin kumin 2023 chhungin mi 62 an rawn luh belh tawh tih Border Security Force hotute chuan an sawi a ni.
Bangladesh atanga Mizoram-a rawn raltlante hi nikum December thla khan Lawngtlai District chhunga Vathuampui, Chamdur Project leh Mautlang-ah te chhungkaw 45 sawn an ni a, tun dinhmunah Parva-III bikah raltlan 212 an awm mek a ni.