Hmeichhia saruak thlalak nena Social Media a inpholang thin te sim turin MHIP hmingin ngen

MHIP General Hqrs. President Ngurmawii Sailo chuan Saruak thlalak nena Social Media a inpholang thin hmeichhia te chu sim turin MHIP hmingin a ngen.
Mizo Hmeichhe Insuihkhawm Pawl (MHIP) Ramlai Block Conference Vawi 7-na nimin-a Thenzawl East VC House-a neih a hmanpuina ah MHIP General Hqrs. President Ngurmawii Sailo chuan tunlai khawvel hmasawnna sang zelah Social Media hman thiam a pawimawh thu leh incheina ah pawh hmeichhia te an fimkhur a pawimawh thu a sawi a. Hmeichhe saruak thlalak pholan Social Media a hmuh tur a awm ta chu pawi a tih thu sawiin, hetiang ti thin, saruak thlalak nena Social Media a in pholang thin zawng zawngte sim turin MHIP hmingin a ngen a, hei bakah hian kawng hrang hranga Mizo hmeichhia, Nu, MHIP ten tan an lak tharna tur te a sawi bawk.

MHIP General Hqrs. President chuan khawvel in a mamawh ber chu a hminga nu mai mai ni lo, Nu tling tak tak an ni tih sawiin, Nu te chu chhungkaw hlimna chahbi kawltu an ni tih a sawi a, “Khawvel siamtha thei kan ni tih kan hriat a, Hmeichhia ten kan pawimawhna kan hriat thar zel a tul a ni,” tiin, “Chhungkua kalpelin khawtlang a siamthat theihloh tih hriaa kan fate ah ram leh hnam hmangaihna kan tuh a pawimawh hle a ni,” a ti.

Hmeichhe hamthatna leh chawikanna lam chauh hawi thei an ni lo tih pawh MHIP President chuan sawiin, fate ngaihsakna nen an kalkawp tir thiam a ngai tih a sawi a, MHIP President chuan a sawi bawk MHIP ten hmun hrang hrangah VC, YMA leh tlawmngai pawl dangte nen thawhhona tha tak an nei thin chu lawmawm a tih thu a sawi bawk.

MHIP Ramlai Block Conference hi an President B. Lalengmawii chuan kaihruaiin MHIP Sub-Hqrs. President Lianthangi pawhin thu a sawi a, Mizo Hmeichhe zinga Padma Shri dawngtu leh MHIP hruaitu hlun B. Sangkhumi hnenah chawimawina hlanin B. Sangkhumi hian thu a sawi a, Member boral te sunna hun an hmang bawk a. Chawhnu lamah Rorelna hun hmangin kum 2022-2024 chhunga an hruaitu tur thlanna an nei nghal bawk a ni.

MHIP Ramlai Block huamchhungah hian Thenzawl khawchhung leh khaw chhehvel Buangpui, Neihloh, Kanghmun South leh Zote South-a MHIP Branch 15 an tel a ni.