Serchhip-ah nikum aiin kumin ah ruahtui tamin Kum chanve chhungin mm 382.7 a tla tawh


Kumin (2022) kum chanve chhungin Serchhip-ah ruahtui millimeter (mm) 382.7 a tla tawh nia chhinchhiah a ni a, nikum aiin kumin hian Serchhip-ah ruahtui tla tam zawkin ruahtui tlak loh thla ala awm lova, kumin a khawlum ber ni in 35°C a tling bawk a ni.

Economic & Statistic Department hnuaia District Research Officer (DRO) Office, Serchhip in an chhinchhiahna atanga a lan danin kumin a kum chanve (January atanga June thla tawp) chhungin Serchhip-a ruahtui tla zat hi mm 382.7 nia chhinchhiah a ni a, June thla ah ruahtui tla tam berin mm 245.1 a tla nia chhinchhiah a ni a, June thla a ni 30 awm ah ni 20 ah ruahtui tla chhinchhiah a ni a. May thla ah ruahtui tlak ni, ni 17 chhinchhiah ni bawkin ruahtui mm 114.4 a tla bawk a, kumin March thla ah khan ruahtui tlak ni ni 5 chhinchhiah niin mm 13.2 a tla bawk. Kumin a thla ruk kan hman zawh takah khan ruahtui tlak loh thla la awm lovin ruahtui tlak tlem ber February thla ah mm 0.3 a tla a, hemi thla ah hian ruahtui tlak ni 2 chiah chhinchhiah awmin April thla ah ruahtui tlak ni khat chhinchhiah awmin mm 0.6 a tla bawk a, January thla khan ruahsur chhinchhiah ni 6 awmin ruahtui mm 9 a tla bawk a ni. Kumin chhunga ni khat-a ruahtui tla tam ber tum chu June 18, 2022 kha niin hemi ni hian ruahtui mm 74.8 a tla a, nikum-ah ruahtui tla tam ber ni chu October 21 niin hemi ni hian ruahtui mm 42.9 a tla nia chhinchhiah a ni thung a, kumin June 17 khan ruahtui mm 40.4 tla bawkin June 19, 2022 khan mm 26 a tla bawk a, hetih hunlaia ruahsur nasa kaihhnawih ah hian chenna In pakhat chu rauhsan a ni bawk.

Chhinchhiahna atanga a lan danin nikum kum chanve (January to June, 2021) chhung khan Serchhip District-a ruahtui tla zat chu mm 258 niin hemi hun chhung hian nikum aiin kumin ah ruahtui tla hi mm 124.7 in a tam zawk a, nikum khan January thla leh February thla ah ruahtui tla a awm lova, June thla tihloh thla dang zawngah nikum aiin kumin ah ruahtui tla ala tam ziah bawk a ni.

Serchhip-a DRO Office-ah hian ni tin-a ruahtui tla zat bakah boruak lum leh vawh lam te pawh a tehna dahin mumal taka chhinchhiah thin a ni a, amaherawh chu kumin January thla khan boruak lum leh vawt an tehna khawl hi a chhiat avang leh Aizawl lamah siamtha tura thawnthlak a nih avangin kumtir lamah chhinchhiah mumal theih a ni lo thung a, March thla atangin boruak lum leh vawh dan hi mumal taka chhinchhiah ni chauhin an chhinchhiah chin ah khaw lum ber ni chu March 21, 2022 kha niin hemi ni hian 35°C lai a tling a, March 23 leh May 1-ah 34°C tling bawkin 33°C kai tum ni 7 lai a awm tawh bawk a, kumin chhunga chhinchhiah chinah 30°C chin aia khaw lum tum ni 32 lai a awm tawh bawk a ni. Nikum (2021) chhunga khaw lum ni ber chu April 28 niin hemi ni hian 35°C a ni ve bawk a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar