World Environment Day pualin zirlai ten Rally nei

Mizoram Pollution Control Board (MPCB) leh District Education Office-te huaihawtin Mizoram District hrang hrangah 'World Environment Day 2022' pualin nimin khan Rally neih a ni a, Serchhip-ah pawh he ni pual hian Presbyterian English School Zirlai naupang ten Rally hi an nei a ni.

Serchhip District atanga Rally nei tura thlan PES Serchhip-a zirlai naupangte hian an School atanga kawng hi zawhin he hun hi Serchhip DEO Office-a thawk te leh MPCB hnuaia Serchhip-a thawktute chuan an telpui a, he ni puala thuchham tur ruahman chu chhamrual niin thuchah hrang hrang ziakin an keng bawk a ni.

World Environment Day hi June ni 5-ah hman thin a ni a, kumin hian Pathianni a nih avângin Zirtâwpni-ah hun hman a ni a, kumin thupui hi ‘Only One Earth’ niin plastic leh sarâng vawikhat hmana kan paih mai thin, Single Use Plastic that lohzia leh kan leilung a tihchhiat nasat ziate inzirtir nan hman a ni a, he Rally-a kalkhâwmte hian Single Use Plastic hmang tawh lo turin thu an tiam (Pledge Taking) a, Single Use Plastic Free School ni thei theuh turin an inchah bawk.

District khawpui chhunga awm ve lo sikul thenkhat te chuan anmahni remchânna hmunah Rally hi an buatsaih ve bawk a ni.