Mipuite tana sawrkar laipui ruahmanna puanzar Mizoram sawrkar in a hreh - BJP President
Serchhip Press Club-a thuthar thehdarhtute a kawmna ah hian BJP Mizoram Pradesh President Vanlalhmuaka chuan kum 2014 inthlanpui ah BJP chuan kawng hrang hranga hma an lak tumna nen mipuite hnenah an inzuar tih sawiin, “Min enchhin ula, kan that loh chuan min paih leh dawn nia kan ti a ni,” tiin hemi tum hian BJP kaihhruai chuan Lok Sabha-ah sawrkar siam tura Member 272 a mamawh laiin member 289 neiin sawrkar an siam tih a sawi a. Hemi hnua inthlanpui awm leh, kum 2019-ah phei chuan BJP hian an thawhpui dang te tel lova Party mal-a sawrkar siam thei tur khawp Member 305 an neih tak thu sawiin, Prime Minister Narendra Modi kaihhruai sawrkar in May 20, 2022-a kum 8 a tlin khan kum 8 an sawrkar chhunga mipuite tana hmalakna an kalpui hrang hrangte State leh District-ah Media kaltlanga puanzar an rel angin Mizoram-ah pawh hma an lak thu a sawi a, Kum 8 chhunga an hnathawh hi mipui ten hriain an chhawr theihna tura lo enpui a pawimawh thu a sawi bawk.
BJP President chuan kum 8 chhunga an hmalakna a tarlan zingah India rama chenna tur In nei lo te tan PMAY kaltlangin khawpui-ah In vbc. 1.2 leh thingtlang ah vbc. 2.3, a vaiin In vbc. 3.5 sak a nih tawh thu te; India rama Electric Eng la luh lohna khua 19,000-ah Deen Dayal Upadhyaya Gram Jyoti Yojna kaltlangin Eng pek fel niin chenna In zawng zawng Saubhagya Scheme kaltlangin Eng pek vek tawh an nih thu te; Swachh Bharat Mission kaltlangin Toilet vbc. 11.22 siam tawh a nih thu te; Har Gar Nal Se Jal Yojna (JJM) kaltlangin kum 3 chhungin In vbc. 6.2 te tui Connection hmangin Tui thianghlim pek an nih thu te; PM Ujjwala Yojna kaltlangin BPL chhungkua eirawngbawlna Gas Connection nei lo mi vbc. 9 te hmeichhe hminga Free LPG Connection semchhuah tawh a nih thu te a sawi a ni.
Hriselna lam kaihhnawih ah khawvel-a Health Care Scheme lian ber hnuaiah Ayushman Card vbc. 18 pekchhuah ni tawhin he Card nei te hian ramchhung damdawi In hrang hrangah kum khat ah cheng nuai 5 thleng a thlawna an hman theih thu leh he Scheme hnuaia inziaklut mi vbc. 3.2 zetin an chhawr tawh niin a sawi a. Rampum ah Medical College 200 hawn belh tawh niin AIIMS pawh 15 hawn belh a nih bakah Medical Stream hrang hrang zir theihna Seat zaa 80-a tipungin District tinah Medical College din tura ruahmanna pawh chak taka kalpui a nih thu a sawi.
Heng bakah hian PM Garib Kalyan Ann Yojna kaltlangin kum 2 deuhthaw Free Ration pek a nih tawh thu leh PM Jan Dhan Yojna avangin mi vbc. 45 in Bank Account an neih tawh thu te, PM Kisan Samman Nidhi kaltlangin loneitu mi vbc. 11.3 hnenah tanpuina cheng vbc. nuai 1.82 pein PM-Crop Insuarance hnuaiah dilna lut vbc. 37.52 te insrure an nih thu te, Kisan Credit Card hmangin cheng vbc. nuai 3.4 pek a nih bakah leitha (DAP)-ah subsidy bag khat zelah Rs. 1200 pek a nih thu a sawi.
India ramah kawngpui siam hna nasa taka kalpui a nih thu te, Airport thar 800 siam belh a nih thu leh rampum-a thingtlang khua nuai 1.75-ah Broadband Connection pein CSC nuai 4.46 pek a nih tawh thu te BJP President chuan a sawi a. Heng hmalakna hrang hrangte hi mipuite tan chhawchhuah a nih laiin Mizoram-ah chuan State sawrkar in a kalpui tha tawk lo nia a hriat thu leh Party induhsakna atan te an hmang nia an hriat thu sawiin, heng te hi lakhawmin Mizoram Governor hnenah an thehluh thu a sawi a, mipuite tana sawrkar laipui in ruahmanna a siam mipuite hnena puanzar chu Mizoram sawrkar in a hreh em em nia a hriat thu a sawi a ni.
Comments
Post a Comment