COVID-19 hri kai enkawllai mi 148 la awm mek

Niminpiah khan Mizoram-ah COVID-19 hri kai mi 19 hmuh belh niin nimin khan hri kai zingah mi 42 enkawl dam an ni bawk a, hri kai enkawllai 148 an la awm mek.

Niminpiah khan Mizoram-ah Sample 231 enfiah leh niin heng atang hian COVID-19 hri kai mi 19 hmuh an ni a, Sample enfiah atanga chhutin za zela 8.23 te chuan hri an kai a ni. Heng hri kai hmuhchhuah thar te hi Rapid Antigen Test hmanga Sample enfiah 231 atanga hmuh vek niin Aizawl District-ah 9, Kolasib District-ah 5, Lunglei District-ah 3 leh Champhai leh Saitual District-ah mi pakhat ve ve te an ni.

Nimin khan Mizoram-ah COVID-19 hri kai enkawl dam mi 42 an awm belh ve leh bawk a, heti hian nimin tlai thlenga Mizoram-a CO-VID-19 hri kai hmuhchhuah tawh chu 2,28,668 niin an zinga 2,27,819 te enkawl dam an ni tawh a, hri kai hmuhchhuah atanga chhutin za zela 99.63 te chu enkawl dam an ni tawh a, hri kai enkawllai mi 148 la awmin hri kai zingah mi 701 an boral tawh bawk. Nimin tlai thlengin District Siaha leh Lawngtlai tihloh District dang zawngah hri kai enkawllai an la awm a ni.