COVID-19 hri kai enkawllai mi 244 la awm mek

Nimin tlai dar 5:00 thleng khan Mizoram-ah COVID-19 hri kai enkawllai mi 244 an la awm.

Niminpiah khan Mizoram-ah Sample 394 enfiah leh niin heng atang hian COVID-19 hri kai mi 22 hmuh belh leh an ni a, Sample enfiah atanga chhutin za zela 5.58 te chuan hri hi an kai a ni. Niminpiah a hri kai hmuhchhuah te hi Rapid Antigen Test hmanga Sample enfiah 388 atanga hri kai hmuh te vek an ni a, Aizawl leh Saitual District-ah mi 6 ve ve, Lunglei leh Hnahthial District-ah mi 3 ve ve leh Kolasib leh Serchhip District-ah mi pahnih ve ve te an ni. Niminpiah khan ZMC-a RT-PCR Laboratory-ah Sample 3 enfiah niin Lunglei-a TureNat Laboratory-ah Sample 3 enfiah a ni bawk a, hri kai hmuh an awm lo thung.

Nimin khan Mizoram-ah hri kai enkawl dam mi 24 an awm ve leh bawk a, heti hian nimin tlai thlenga Mizoram-a hri kai hmuh tawh chu 2,28,022 niin an zinga 2,27,081 te chu enkawl dam an ni tawh a, hei hi hri kai hmuh atangin zaa 99.59 enkawl dam ang niin hri kai enkawllai 244 an la awm a, hri kai zingah mi 697 an boral tawh bawk a ni.