Serchhip Block Level Health Mela Chhingchhip-ah neiin mipui ten an hlut hle

India ram zalenna kum 75-na lawmna, Azadika Amrit Mahotsav kal zelah Ministry of Health & Family Welfare ruahman angin nimin khan Serchhip District-ah pawh Block Level Health Mela tan a ni a, Serchhip Block tan Health Mela hi Chhingchhip Community Hall-ah neih niin Chhingchhip leh a chhehvel khua ten he Health Mela hi an hlut hle.




Chhingchhip Community Hall-a Serchhip Block Level Health Mela hi District Bawrhsap Nazuk Kumar IAS chuan hawngin Chhingchhip leh a chhehvel mipuite tana Health Mela hlu tak buatsaihtute chungah lawmthu sawiin, he Mela a hlawhtlin theih nana thawktute zawng zawng chungah lawmthu a sawi a, an inpekna te chu mipuiten an tangkaipui hle dawn a ni, a ti. a Chhingchhip leh a chhehvel mipuite pawh a lawmpui thu sawiin, District chhunga Doctor thiam ber ber ten an khuaah ngei an kalchilh hi lo hmang tangkaia, a mamawh apiangten lo pan ngei turin a chah bawk.

Bawrhsap Nazuk Kumar chuan, natna tam tak hi nunkawng thianghlim leh felfai tak hmanga inven theih a ni tih pawh sawiin, mipuiten nunphung hrisel leh thianghlim lam kan uar deuh deuh a tul thu a sawi a. Natna te hi hma taka hmuhchhuah chuan enkawl dam a awl zawk thin avangin rang taka damdawi In pan thuai nachang hriat a pawimawh thu a sawi a. Sawrkarin mipuite hriselna atana hma a lakna hrang hrang leh tunhnaia chung hmalakna District chhunga kalpuite leh hmachhawp hnaivai awm mekte a tarlan bakah COVID-19 hripuiin min la chim reng avangin mipuiten vaccine lak lamah tan kan lak a, himna dan (CAB) te tha taka zawm zel turin a chah bawk a ni.

Serchhip Block Level Health Mela hawnna hun hi Serchhip CMO Dr. Lalzawmi chuan kaihruaiin Chhingchhip PHC-a Medical Officer Dr. Andrew Lalramliana chuan inlawmna thu a sawi a, Chhingchhip VCP J. Lalnunmawia chuan hetiang hun an khuaa buatsaih a ni chu lawmawm an tih thu sawiin, an khuaa PHC chu a changtlung tawk loh avangin tun aia phuisui zawka siam sak turin he huna tel Bawrhsap leh Health Department hotute chu a ngen bawk a ni.

Nimin-a Health Mela neih ah hian District Hospital atangin thawktu Doctor leh kawng hrang hranga thiamna bik nei te kalin inentirna dawr 22 zet hawn a ni a, heng dawr hrang hrang pantute hi Damdawi In-a an Health Record hrang hrang an dahthatna tur Health ID, ABHA ID chu siam sak nghal zel niin Healthcare hnuaia Health Insurance Card (Ayushman Bharat PM-JAY Card) siamsak an nih bakah Non-Communicable Diseases (NCD) Screening pawh tih sak nghal zel an ni bawk.

He hunah hian Serchhip District Hospital atangin Dental, Ortho, Surgery, AYUSH, Gynae leh Medicine Doctor thiam te kalin Integrated Counselling and Testing Centre (ICTC), Non-Communicable Diseases (NCD), Physical & Stress Management (P&SM), ECG, ENT & Audiometrist, Mental Health, TB, Malaria, National Tobacco Control Programme (NTCP), Physiotherapist leh Opthalmic Assistant te kalin damlo ten an mamawh apiangah an rawn a, Laboratory Technician ten Test tul ang ang buaipui bawkin, Food & Drug Administration ten an mamawh ang damdawi te a thlawnin an pe bawk a. Hei bakah hian a mamawh te hnenah Vaccine chi hrang hrang pawh pek a ni bawk.

Hriselna Kutpui hi National Health Mission, Health & Family Welfare Department Mizoram bakah Education Department, Information & Public Relations Department, Women and Child Development, Rural Development, Sports & Youth Affairs, Ayush, Food Safety, Urban Development and Poverty Alleviation (UD&PA) leh Art & Culture Department te nen tangkawpa buatsaih a ni a. Karleh Thawhtanni khian East Lungdar Block tan East Lungdar-ah neih leh tura ruahman a ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar