Agriculture Department in Serchhip-ah Dal thar

Serchhip-a Agriculture Department in a enchhinna atana nikum-a Lentil Dal an chin chu seng mek niin kumin ah nasa zawka chin theih beisei a ni.

Serchhip-a Agriculture Department hian nikum Thlasik-ah khan Lentil Dal, WBL 77 chu Serchhip Mat Phai-a Chamdur Zau-ah mimal ram, F. Lalawikunga Serchhip Field Veng a mi ram chu hawhin an a enchhinna atan an ching a, tun tumah hian kg. 20 chin niin December 21-24, 2022 chhung khan an ching a, March thla tawp khan sengin Dal an tharchhuah te hi hun engemaw chen an pho tan hnuin tunlai hian Serchhip Agriculture Complex-a Mini Dal Mill-ah an her mek niin quintal 2 vel thar tura beisei a ni.

Serchhip DAO Tlangtimawia Zote chuan kumin a Lentil Dal an enchhin ah hian a tirah chuan quintal 4-7 vel thar thei tura an beisei thu LENKAWL hrilhin, amaherawh chu January thla a ruahsur ah a hmun ah tui a lo tling tih a sawi a, hei hi Dal hian an huat em em avangin an beisei ang an thar dawn loh thu a sawi a. Amaherawh chu an enchhinna chu hlawhtling thawhkhat ah an inngai tih sawiin, kumin a Thlasik lo thleng turah chuan a nawlpui in an chin tura inzirtir ngam a nih tawh tur thu a sawi a ni. Serchhip DAO chuan tuna an Dal tharchhuah te hi Bazar-a kan lei thin ang tho kha a ni tih a sawi a, Serchhip in Dal herna khawl a neih te tangkai taka hman a nih theihna tura nasa zawka hmalak zel a pawimawh thu a sawi bawk a ni.