Serchhip District Electoral Roll tlangzarh in Vote nei thei 53,372 an awm mek

Kumin January ni 1-a kum 18 tling chin te laa Electoral Roll ennawn hna thawh chu zawhfel niin Inrinni khan Mizoram District hrang hrangah Final Electoral Roll tarchhuah a ni a. Serchhip District-ah pawh Electoral Roll thar hi tarchhuah niin Serchhip District chhunga Assembly bial pathum-ah Vote nei 53,372 an awm a ni.

Kumin January 1-a kum 18 tling chin te laa Electoral Roll Special Summary Revision neih tur atan hian nikum November ni 1 khan Draft Electoral Roll chu tarchhuah a lo ni tawh a, hemi atang hian hming thun thar, paih leh siamthat ngai te tan dilna hun hawn nghal niin heng dilna hrang hrang te hi enfiah a nih hnuah Electoral Roll thar hi peihfel niin Election Commission of India in ruahmanna a siam angin Inrinni, January 15, 2022 khan District hrang hrangah tarchhuah a ni ta a ni.

Serchhip District-ah pawh Electoral Roll thar hi Serchhip District Election Officer Kumar Abhishek IAS chuan a tlangzarh a, hetianga Electoral Roll thar tlangzarh theiha a awm leh ta chu lawmawm a tih thu sawiin, Electoral Roll felfai leh thianghlim kan neih theihna tura thawktu zawng zawng- BLO, Election Branch, ERO, AERO, Political Party, tlawmngai pawl leh khawtlang hruaitute chungah lawmthu a sawi a. India ram chu mipui ten kan aiawh thlanga ro kan relna ram a ni tih sawiin, hei vang hian kan aiawha roreltu tur kan thlanchhuah theih nan khua leh tui dik tak, kum tling chin te chu Electoral Roll-ah kokim taka kan chuan chu democracy innghahna pawimawh tak a nih thu leh a hlut thu a sawi a ni.

He hunah hian Serchhip Election Officer Lalrinchhani Ralte chuan Electoral Roll Special Summary Revision neih a nih dan leh Serchhip District dinhmun tlangpui te a tarlang a, District Election Officer in Electoral Roll thar a tlangzarh hnu hian Serchhip District chhunga Political Party hrang hrangte hnenah a tul anga an hman theih turin Electoral Roll thar hi hlan nghal an ni bawk.

Electoral Roll tarchhuah tak atanga a lan danin Serchhip District-ah hian Assembly Constituency pathum (3) awmin Polling Station 85 a awm a, heng zinga 38 te hi khawpui a awm niin a dang 47 te hi thingtlang-a awm an ni thung. District pumah Vote nei thei mipa 26,155 leh hmeichhia 27,217, an vaiin 53,372 an awm a, Vote nei thei zingah mipa aiin hmei-chhia hi 1062 in an tam zawk a, Gender Ratio chu 1057 a ni. Serchhip District-a Bial tinah hian Vote nei thei mipa aiin hmeichhia an tam zawk vek a ni. Heng vote nei thei zingah hian Service Voters mipa 416 leh hmeichhia 4, an vaiin mi 420 an awm bawk.

26-Serchhip (ST) AC-ah Polling Station 29 awmin Vote nei thei mipa 9368 leh hmeichhia 10,554, an vaiin mi 19,922 an awm a, a hma aia Vote nei punna hi 382 niin hei hi za zela chhutin 1.95 a ni a. Service Voters mipa 198 leh hmei-chhia 2, an vaiin mi 200 an awm a ni.

27-Tuikum (ST) AC-ah Polling Station 30 awmin Vote nei thei mipa 8225 leh hmeichhia 8351, an vaiin 16,576 an awm a, a hma aia vote nei thei punna hi 289 niin za zala chhutin 1.77 in a pung bawk a, Service Voters mipa 124 leh hmei-chhia 1 an awm bawk.

28-Hrangturzo (ST) AC-ah Polling Station 26 awmin Vote nei thei mipa 8146 leh hmeichhia 8308, an vaiin 16,454 an awm a, a hma aiin vote nei thei 348-a tam zawkin za zela 2.16 in a pung a, Service Voters mipa 94 leh hmeichhia pakhat an awm bawk a, District puma Vote nei thei punna hi 1019 niin za zela 1.96-a pung ang a ni.

Serchhip-a Electoral Roll thar tlang-zarhna hunah hian ERO, AERO leh thawktu dangte bakah Political Party aiawhte telin Continuous Updation chu kalpui chhunzawm reng a ni dawn bawk a ni.