Tlabung khaw kum 150 tlin lawmna neih a ni

Tlabung khua in kum 150 a tlin lawmna chu nimin khan Tlangliana Mual, Tlabung-ah neih a ni a, he hun hi Assembly Speaker Lalrinliana Sailo chuan hmanpuiin hemi puala Souvenir (lehkhabu) an buatsaih chu a tlangzarh nghal bawk.

Tlabung khaw kum 150-na lawmna ah hian Assembly Speaker chuan Mizoram history-a hmun pawimawh tak luahtu Tlabung khua in kum 150-na lawm thei dinhmuna an awm chu a lawmpui takzet thu sawiin, mipui kalkhawmte chu Sesquicentennial Celebration chibai a buk a. Tlabung chu khaw ropui tak, Mizoram kawtchhuah hmasa leh chanchin tha hrilna hmun pawimawh hmasa, hnam hrang hrang in unau taka chenhona hmun a ni tiin, hun lo kal zel turah pawh tangrual taka ke pen tlang zel turin kalkhawmte a chah a ni.

Speaker chuan kan ram economy thanlen zelna turin ramdang nena insumdawn tawnna tih hmasawn a pawimawh takzet tih sawiin, hemi kawnga kan State hmasawnna turin amah ngei pawhin theihtawp alo chhuah thin tawh thu leh Bangladesh nena insumdawn tawnna tur buaipuiin Bangladesh-ah vawi 5 kal tawhin Bangladesh Prime Minister hnenah alo thlen tawh thu a sawi a. Kawrpuichhuah leh a chhehvel chu International Trade hmunpui pawimawh tak ala ni chho zel dawn a, hei hian kawng hrang hrangin hmasawnna ala thlen zel dawn a ni, a ti a, he sumdawnna hmunpui ti hlawhtling tur hian Tlabung leh a chhehvel mipuite hmalak puiah a sawm a. Thalaite hnenah fuihna thu sawiin Assembly Speaker chuan, Tlabung khua dinhmun chawikang zel turin mawhphurna sang tak an nei tih hre reng chunga zirna kawnga theihtawp chhuaha, ruihhlo laka fihlim turin a chah bawk.

Bialtu MLA leh Khual Thlengtu ni bawk Nihar Kanti Chakma chuan Tlabung tana ni pawimawh tak, kum 150 tlin lawmnaah Assembly Speaker Lalrinliana Sailo leh I&PR Minister Lalruatkimabakah Official-te leh he huna lo kal te chu an lo lawm tih a sawi a. Tlabung leh West Tuipui bial a hmasawn zel theihna turin a chhunga cheng mipuite tangruala theihtawp an chhuah tlan a tul thu sawiin, hmasawnna tlo leh daih rei nei zel turin mipuite thawhho puiah a sawm bawk.

Mizo lalte kut atanga Mary Winchester (Zoluti) lalet leh tura British sawrkarin a rawn tirh Thangliana (Lt. Col. TH. Lewin) chuan Khawthlangtuipui-ah Lawngleng-a rawn chhovin November 9, 1871 khan khan Tlabung khua hi alo din a ni.

Tlabung khaw kum 150 tlin lawmna neih zawh hnu hian Assembly Speaker Lalrinliana Sailo leh amah zuitute hian Bangladesh nena insumdawn tawnna tur, Kawrpuichhuah ICP Trade Centre hmun chu an tlawh bawk a ni.