Serchhip District-ah hri kai enkawllai tlahniam zel

Serchhip District-ah COVID-19 hri kai en-kawllai an tlem ve zel a, nimin tlai thleng khan hri kai enkawllai mi 494 an la awm.

Thla hmasa tawp lamah Serchhip District-a COVID-19 hri kai hmuhchhuah nasa taka an pun avanga District hrang hrang zingah hri kai enkawllai tam lamah pahnihna dinhmun te Serchhip District in a luah hnuah tunah chuan hri kai enkawllai hi an tlahniam ve hret hret zel a, Inrinni khan hri kai mi 52 te enkawl dam niin nimin khan mi 8 te enkawl dam an ni ve leh a, heti hian nimin tlai thleng khan Serchhip District-a hri kai enkawllai chu 494 niin Mizoram District hrang hrangte zingah hri kai enkawllai tam lamah pathumna dinhmun a luah ve leh ta a, Serchhip District aiin Aizawl (3275) leh Lunglei (729) District-ah hri kai enkawllai hi an tam leh tawh zawk a ni.

Inrinni khan Serchhip District-a TrueNat Laboratory-a Sample enfiah atangin hri kai mi pakhat hmuhchhuah niin New Serchhip ami a ni a, Rapid Antigen Test hmangin hri kai mi 29 hmuh ni bawkin Serchhip-ah 13, Thenzawl-ah 7, Chhiahtlang-ah 4, North Vanlaiphai-ah 3 leh Kanghmun South-ah mi pahnih te an ni a. Nimin khan hri kai mi pathum hmuh awmin Serchhip, Chhiahtlang leh Sialhau khua pakhat theuh an ni.

Heti hian Serchhip District-a hri kai hmuh chu 4501 niin an zinga 3994 (88.73%) te enkawl dam an ni tawh a, enkawllai 494 leh hri kai boral mi 13 an awm tawh a. Tun thla-a ni 7 kan hman tawh chhungin hri kai hmuh 284 leh enkawl dam 357 an awm tawh a ni.