Lalbiakthanga Pachuau hnenah Padma Shir hlan

Mizoram atanga Padma Shri Award (Literature & Education) dawng tura thlan Lalbiakthanga Pachuau (95), Editor Zoram Tlangau chuan nimin khan India President Ram Nath Kovind hnen atangin Padma Shri hi a dawng.

Padma Shri Award (Literature & Education-Journaslism) dawngtu Lalbiakthanga Pachuau hi Journalist niin MJA General Hqrs. ah pawh Term thum lai President hna lo chelh tawh leh Vice President term hnih leh Secretary term khat lo chelh tawh a nih bakah MJA General Hqrs. in 'Prominent Journalist' a a puan tawh a ni a. Kum 2016 khan Mizoram sawrkar chuan 'Prominent Press Representative' mi panga a puan zingah tel lehin, hemi kum vek hian Mizoram Press Accreditation Committee chuan 'India rama Working Journalist upa ber' ah a puang a, tun thlengin India ramah he nihna hnialtu an awm lo a ni.

Lalbiakthanga Pachuau hi March 25, 1927 khan Saichal khua-ah Satkunga Pachuau (L) leh Dokungi Pachuau (L) te inkarah a piang a. Kum 17 chhung India sipai-ah a tang a, Havilder-in kum 1962 khan a pension a ni. Sipai-a a tan lai hian Indopui II-naa a tel bakah 1948 leh 1950 inkara Jammu & Kashmir indona-ah a tel a. Sipai chawimawina Medal/Award panga a dawng a ni. Kum 1970-ah Journalist-ah lutin pawl hrang hrangah hruaitu hna te pawh a lo chelh tawh a ni.

Kum 2020-a Padma Shri Award dawng tur mi 118 puan zingah telin hri leng avanga a hun taka a dawn theihloh hnuah nimin khan dawngin MJA chuan an lawmpui thu an sawi a ni.

Comments

Popular News (Last 30 Days)

Serchhip DCSO sawn a ni