Hri kai thar 43 leh dam 105

Nimin khan Serchhip District-ah COVID-19 hri kai mi 43 hmuhchhuah belh leh awmin mi 105 lai enkawl dam an awm a, hri kai zingah mi pakhat a boral thung.

Nimin a Serchhip District-a hri kai hmuhchhuah zinga mi 15 te hi Ser-chhip ami niin Chhiahtlang-ah hri kai mi 12 hmuh belh leh an ni bawk a, Thentlang-ah hri kai mi 7 hmuh niin Kanghmun-ah 5, Thenzawl-ah 3 leh Keitum-ah pakhat hmuh an ni bawk.

Serchhip District-a hri kai te zingah nimin khan mi pakhat boral belh lehin nimin chawhnu dar 1:55 khan Laltanpuia (38) h/o Lalneihtluangi, Chhiahtlang Kawn Veng chu DCHC, Serchhip-ah a boral a. Amah hi natna dang neisa niin Nov. 7, 2021-ah COVID-19 hri a kai tih hmuhchhuah a ni a, hemi ni hian DCHC-ah dahluh nghal ni mah se nimin khan a boral zui ta a ni.

Nimin khan Serchhip District-a hri kai enkawl zingah mi 105 lai enkawl dam an awm belh leh bawk a, heti hian nimin tlai thleng khan Serchhip District-a hri kai hmuhchhuah tawh chu 4544 niin an zinga 4099 chu enkawl dam an ni tawh a, hri kai hmuhchhuah atanga za zela 90.29 te chu enkawl dam ni tawhin hri kai enkawllai 431 an la awm a, hri kai zingah mi 14 an boral ta a ni.