Health Minister in ZMC-a thawktute a kawm

Health Minister Dr. R. Lalthangliana chuan Zoram Medical College (ZMC)-a Academic Department hrang hranga thawk Faculty Member te chu nimin khan SAD Conference Hall-ah a kawm.

He inkawmna ah hian Health Minister chuan ZMC chu kum 3 leka upa nimahse hma a sawn chak em em tih sawiin, thildang zawng aiin thiamna lama thang chhuah (academic excellence) an ngaih pawimawh ber a tul thu a sawi a, hemi atana mamawhte pawh a theih ang angin an ngaihtuah zel dawn tih a sawi a. Kum 2 a ral meuh chuan ZMC-a zirlai First Batch te an zir zo tawh dawn a, Doctor tha leh rintlak, thiam tak an chherchhuah ngei a beisei thu a sawi a, theihtawp chhuaha an thiamna leh theihna te chu an zirlaite tan sawr chhuak tura tan la zel turin a chah a ni.

ZMC Zirtirtute chuan COVID-19 hripui leng karah pawh an theihtawp an chhuah reng tih he hunah hian sawiin, India ram hmun dang aia hripui leng vawrtawp (peak) kan thlen har avangin duh angin hma an la chak thei lo erawh a pawi an tih thu an sawi a, hrileng dinhmun a ziaawm hret hret zel an beisei thu leh a nih tur anga Class kal mumal theih an nghakhlel tih an sawi, an zirlaite chu an chhuanawm an tih thu leh India ram hmun danga an experience tawhna atangin zirtirtute zah thiam kawngah leh zirlai ngaih pawimawh kawngah an fakawm hle tih an sawi bawk.

ZMC-a zirlai First Batch te chuan Civil Hospital, Aizawl-ah leh Synod Hospital, Durtlang-ah Clinical Posting an neih mek thu sawiin, hei hi an chhawr tangkai takzet tih an sawi a, MZU nen an thawhhona a that thu leh an tangkaipui thu an sawi bawk.

ZMC-a len chhoh zel avangin an hnathawh leh OPD-a damlo inentir an pun zel bakah hmalakna a tam zel tak avangin Health Management Information System changtlung tak an mamawh tawh thu pawh an sawi a, heng bakah hian Department thenkhata thawktu indaihlohna leh mamawh hrang hrangte sawilan a ni bawk a, intuaihriam zel an mamawh thin avanga India ram-a Medical College changtlung zawkah te a khat tawka Training neih tin a pawimawh thu an sawi bawk.

He hunah hian India ram hmun hrang hranga Medical College te dinhmun thlirin ZMC tihchangtlun belh zel dan turte pawh sawiho a ni a, Health Secretary R. Lalramnghaka, ZMC Director Dr. John Zohmingthanga leh ZMC Registrar Dr. Jane R. Ralte te pawh an tel a ni.

Comments

Popular News (Last 30 Days)

Serchhip DCSO sawn a ni