Chhiahtlang-ah 4C-a hri kai enkawl an tlahniam zel

Chhiahtlang Joint VLTF hruaitute chuan an huamchhunga COVID-19 hri kai hmuhchhuah in ziaawm lam a pan zel thu sawiin, 4C-a hri kai enkawl pawh an tlahniam ve zel tih an sawi.

He thu hi nimin a Chhiahtlang 4C tlawhtu LENKAWL hnenah Chhiahtlang Joint VLTF hruaitute chuan sawiin Chhiahtlang-ah hian COVID-19 hri kai enkawllai mi 39 an la awm thu leh heng zinga 27 te chu 4C-ah enkawl an nih thu leh midang 12 te chu In lama inkhunghrang an ni tih an sawi a. An huamchhungah hian nikum lam atangin hri kai an awm thu leh CCC lamah te enkawl an nih hnuah kumin September thla khan hri kai hmuh-chhuah an pun avangin Govt. Chhiahtlang M/S-ah 4C hi siamin September 27-ah hri kai dahluh tan an ni tih an sawi a. Hri kai hmuhchhuah hi an pun zel avangin Primary School-ah 4C hi siam belh lehin Oct. 28-ah hri kai dahluh tan leh an ni tih an sawi a, tunah hian hri kai enkawllai an tlem ve tak zel avangin 4C-I hi titawpin 4C-II ah hian hri kai enkawl zui zel an tum thu an sawi a ni.

Chhiahtlang Joint VLTF hruaitute chuan an chhinchhiah danin Chhiahtlang-a hri kai mi 178 enkawl dam an nih tawh thu leh hri kai zingah mi 2 an boral tawh thu sawiin, hri kai boral mi pakhat hi Aizawl lama hri kai hmuhchhuah a ni tih an sawi a. Hri kai 4C-a enkawl te hi a thlawna Chaw an la inpek thu sawiin, 4C atan hian bialtu MLA leh Assembly Deputy Speaker Er. Lalrinawma chuan sumfai tam tham tak a pek tawh thu an sawi a, hei bakah hian MGNREGS-a Job Card nei ten ni khat hlawh theuh thawhin pawl, Kohhran leh mimal ten thilpek an pek thu an sawi a. An huamchhunga YMA Branch 5 ten 4C-a Duty leh eirawngbawl hna a inchhawka an thawh thu an sawi bawk. Chhiahtlang-a 4C-a awm te hi chawlhkar zan 3 leh Pathianni-ah inkhawmna an neihpui thin tih VLTF hruaitute chuan sawiin, hri kai an enkawl zingah harsatna lian nei an awmlo tih an sawi bawk.

Comments

Popular News (Last 30 Days)

Serchhip DCSO sawn a ni