Serchhip District-ah Hri kai enkawllai za li aiin tlem tawh

Serchhip District-ah COVID-19 hri kai enkawl dam awm belh zelin nimin tlai thleng khan hri kai enkawllai pawh mi za li aiin an tlem tawh.

Serchhip CMO Office atanga thu kan dawn danin nimin khan Serchhip District-a hri kai te zingah mi 77 enkawl dam an awm belh leh a, heng te nen hian Serchhip  District-a hri kai zingah mi 4175 te enkawl dam an ni tawh a, hei hi hri kai hmuh tawh atanga chhutin za zela 91.09 a tling tawh a ni.

Hetihlai hian nimin khan Serchhip District-ah hri kai hmuhchhuah mi 23 an awm belh ve leh bawk a, an zinga 12 te hi Serchhip-a hri kai hmuh te niin Thenzawl-ah mi 10 leh Hualtu ah hri kai mi pakhat hmuh an ni bawk. Niminpiah khan Serchhip-a TrueNat Laboratory atangin hri kai mi 10 hmuh niin an vai hian Serchhip khawpui chhung ami te an ni a, nimin lama Rapid Antigen Test hmanga hri kai mi 43 hmuh kan tarlan tawh bakah hri kai mi 6 hmuh belh leh an awm bawk a ni.

Heti hian nimin tlai thlenga Serchhip District-a hri kai hmuhchhuah chu 4583 niin an zinga 4175 te chu enkawl dam an ni tawh a, hri kai enkawllai 394 la awmin hri kai zingah mi 14 lai an boral tawh thung a ni.