Chanchin thar thenkhat :

CM in Governor hmu

Mizoram Chief Minister Zoramthanga chuan nimin zing khan Governor Hari Babu Kambham-pati chu Raj Bhavan-ah hmuin thu pawimawh hrang hrang an sawidun a. Mizoram Governor Kambhampati hi taksa hrisel tawkloh avangin hun engemawchen State pawna a inenkawl hnu in November ni 5, 2021 khan Mizoram a rawn let leh a ni.

Tlabung kum 150-na lawm leh

Tlabung khua kum 150 tlin lawmna ni 2-na chu nimin khan neih leh niin he hun hi I&PR Minister Lalruatkima chuan khuallian niin a hman-pui a, Tlabung Bazar Bungkawn-a kum 150-na Lungphun a hawng nghal a ni. I&PR Minister chuan Mizoram history-a hmun pawimawh tak luahtu, Mizoram kawtchhuah hmasa leh chan-chin tha hrilna hmun pawimawh hmasa Tlabung kum 150 tlin chu lawmawm a tih thu sawiin, kum 150 tlin lawmna chu rahbi thar thlentu leh kawng hrang hranga hmasawnna thlentu a nih ngei a beisei thu a sawi bawk. Nimin-a Tlabung kum 150 tlin lawmna ah hian Lunglei HPC Vice Chairman Lawmawma Tochhawng chu Khual Zahawm niin Bialtu MLA Nihar Kanti Chakma chu Khual Thlengtu a ni a, Tlabung leh a chhehvela cheng hnam hrang hrang ten an hnam lam te entirin hun ropui leh hlimawm tak hman a ni.

Mamit Vety Hospital hawng

AH&Vety Department changtu Minister Dr. K. Beichhua chuan nimin khan Mamit-ah District Veterinary Hospital leh Satellite Boar Semen Station chu a hawng a, hun khirh tak kan tawh kara District hrang hrangah Vety Hospital 7 lai sak mek zinga Mamit Vety Hospital hawn theih a ni chu lawmawm a tih thu sawiin, Mamit Vety Office-a thawkte chu quantity aia quality ngai pawimawh turin a chah bawk. Mamit-a District Veterinary Hospital tan hian X-Ray, Ultrasound leh Mobile Veterinary Unit pathum pek thuai tum a nih thu nimin-a he hun hmanna ah hian Minister chuan a sawi bawk.

Champhai Master Plan sawiho

Champhai Town Planning & Development Committee chu nimin khan an Chairman leh Law & Judicial Minister TJ. Lalnuntluanga hovin Champhai DC Conference Hall-ah an thukhawm a, he hunah hian ‘Champhai Master Plan 2041’ buat-saih mek chungchang sawiho niin Master Plan hnuaiah Champhai khawpui leh Town area a khaw per-te khairual taka kaltir tum a nih thu leh Satellite Development Formation leh Urban Decentra-lisation-te ngaihpawimawh a nih thu tarlan a ni.

MNF President pangpar hlan

MNF Thalai, Mizo National Youth Front (MNYF) Hqrs. chuan an Party President leh Chief Minister Zoramthanga chu a thubuai-a hnehna a chan lawmpuina atan nimin khan a Pisa-ah pangpar an hlan a, he hunah hian an Vice President Lalzahawma Khiangte chuan an Party President chu rem leh rem lovin mipuiin an hnawl theih nan thubuai siamsak a ni tih sawiin, Court in thiam chantir-a thudik hailana a awm chu an lawm thu a sawi bawk.

C. Kamlova hnenah Padma Shri hlan a ni

Niminpiah-a India President in Padma Award hrang hrang a semchhuah ah Mizoram atangin C. Kamlova chu Padma Shri hlan a ni a, Literature and Education Section-ah chawimawina hi dawngin, Hindi tawng chawilartu leh Mizo tawng-a  dictionary siamtu a ni.