Latest News

Chhungkaw 10 hnenah Vawk chaw channa khawl pe Serchhip-ah Ran chaw siamna peihfel tep a ni

AH&Vety Department leh FOCUS Serchhip District te hmalakna in Serchhip District-a Vawkpui vulh tur mi 10 te hnenah nimin khan Vawk chaw channa khawl sem niin Vawk chaw siam dan zirhona neih nghal a ni a. He hunah hian Serchhip District-a ran chaw siamchhuak tura hmalakna kal mek chu peihfel tep a nih thu tarlan a ni.


Serchhip District-a Vawkpui vulh tura FOCUS hmalakna hnuai thlan te hnena Vawk chaw channa khawl, Chaff Cutter semna puala Inkhawm tawi AH&Vety Training Hall, Serchhip-a neih ah Dr. Lalrotluanga Sailo, Deputy Director (Vety) PMU, FOCUS chuan FOCUS chuan Department 4, Agriculture, Horticulture, Soil and Water Conservation Department leh AH&Vety Department-a farmer te tan hma an lak thu leh AH&Vety Department hnuaiah chuan Vawk, Sial leh Ar vulh kawngah te hma an lak thu a sawi a. Vawk bika hmalakna ah heng chhungkaw 10 te hi a In sakna tur pek an nih hnuah Vawk pui tur a note 6 pek leh tur an ni tih a sawi a. Hetianga hmalakna nasa taka kalpui a ni chungin ASF hri leng avanga harsatna nasa tak a thlen tak thu leh Vawk tam tak thiin hemi kawngah pawh hian FOCUS chuan hmalakna nasa taka an kalpui thu a sawi a. Hri leng avanga Vawk an chan a nih pawha hnual phah nana hmang lo tura Vawkvulhtute chu chahin, harsatna thleng hi a ziaawm thuai beisei a nih thu leh Vawk sa ei nasa kan nih avangin a hralhna lamah harsatna a awm zui loh a beisei thu a sawi a. Ran chaw upna tur hmanrua te pawh pek an nih dawn thu sawiin, tuna an pek, a chaw channa khawl pawh hi khawl chak tak, 3HP a nih thu a sawi a. Tanpuina sem te sawrkar atangin awm lo mah se an hmalakna chu kalpui zel tur an nih thu Vawkvulhtute chu hrilhin, chutih kara sawrkar atanga tanpuina awm te chu tangkai taka hmanga a hlawhtlinna hmuh tur a awm ngei a beisei thu leh a hlawhtlinna chhawrtu tur chu anmahni bawk an ni tih hre turin a chah bawk.

Serchhip District AH&Vety Officer Dr. R. Lalmakthanga kaihhruai he hunah hian FOCUS Serchhip District-a District Project Manager K. Laltlanmawia chuan Serchhip District ah Ran chaw siamchhuak tura hma an lak thu sawiin, hemi atan hian SEDP hnuaiah kumin khan FOCUS chuan Serchhip District-a khaw 20-ah chhungkaw 550 in Vaimim an chin turin a chi quintal 33 semin Tin 800 hmun velah chin a nih thu a sawi a. Tunah hian Vaimim tharchhuah te hi kg ah Rs. 20/- zela an lei mek thu leh quintal 3500 vel tharchhuah theih an inbeisei thu a sawi.

Hei bakah hian hemi a pawlh tur hian Bekang pawh a chi quintal 21 leiin khaw 30-ah chin mek a nih thu leh engemaw zat thar in beiseiin an tharchhuah ang ang te kg ah Rs. 100/- zela an lei sak dawn thu District Project Manager chuan sawiin, heng Vaimim leh Bekang herna atan hian FOCUS hmalakna hnuaiah Composite Feed Mill din a nih dawn thu te, hemi atan hian cheng nuai 10 sanction in a khawl hman turte pawh Serchhip rawn phurhthlen ni tawhin Company atanga Engineer ten rawn bun felin ni 10 chhung vela peihfel hman beisei a nih thu a sawi a. He khawl hmang hian Ar chaw leh Vawk chaw siamchhuakin, heng te hi pek tum turin Vawkvulhtute chu a chah bawk.

Tun tumah hian Serchhip District a Vawkvulhtu mi 10 hnenah Vawk chaw channa khawl, Chaff Cutter hi hlan niin an zinga mi 7 te chu Serchhip khua niin Keitum, Bungtlang leh Khawlailung-ah pakhat theuh an awm bawk a, Vawk chaw up that dan pawh zirtir nghal an ni bawk.

Comments

Chhiar Hlawhte