Chanchin thar thenkhat :

CM-ah Ambulance 6 hlan

National Highways and Infrastructure Development Corporation Ltd. (NHIDCL) chuan Mizoram sawrkar hnenah Ambulance paruk (6) pein nimin khan Chief Minister Zoramthanga hnenah NHIDCL Executive Director chuan a hlan a. Heng Ambulance te hi hman nghal theih tura thuam sa vek niin Principal Director, H&FW Department hnenah hlan chhawn nghal a ni. NHIDCL hian tunah hian Mizoram-ah kawngpui siam hna an thawk mek a. Ambulance hlanna neih zawh hian Chief Minister ho hian Meeting neih chhun-zawm nghal niin Mimbung atanga Parva-II thleng, khawchhak ramri hrula kawngpui siam tura ruahman Initial Survey an neih chu thlirho a ni.

Minister in chawimawina hlan

Aizawl East-II bialtu MLA leh Sports Minister, Robert Romawia Royte chuan kumin-a a bial chhung atanga HSLC leh HSSLC pass thar te hnenah chawimawina a hlan a. Tun tumah hian HSLC leh HSSLC-a Mizoram puma Top 10-a lang mi pathum te hnenah Laptop Computer hlanin midang Distinction-a pass  mi160 te hnenah lawmpuina SL&PB siam, Mizo English Dictionary chu MLA Fund atangin a hlan bakah pianphunga rualbanlo ni chunga Law Graduate (LL.B) zo thei mi pakhat hnenah Laptop a hlan bawk. Hei bakah hian Robert Romawia Royte hian a bial chhunga fa nei tam thlanchhuah mi 17 te hnenah Rs. 2,50,000/- semchhuakin fa 15 hringa fa nei tam ber hnenah cheng nuai khat hlan a ni.

LADC Protem Chairman lalut

Lai Autonomous District Council-ah sawr-kar thar a din hnua Chairman thlanna neih a nih leh dawn avangin Chairman thar thlanna buatsaih tura Protem Chairman atana ruat, 24-Tuithum-hnar MDC bial atanga thlan tlin H. Lalmuansanga chu nimin khan Lawngtlai Bawrhsap Dr. Andrew H. Vanlaldika chuan rinawmna thu tiam tirin a lalut a. Protem Chairman lakluhna hun hi Lawngtlai DC Office Chamber-ah neiin LADC Secretary Lianchungnunga chuan a kaihruai a ni.

Hri leng dona hmanrua hlan

United Way of Bengaluru (UWBe) ten CSR kaltlanga COVID-19 dona hmanrua Mizoram tana an pek, BiPAP Ventilator 88 leh Consumables 176 te chu nimin khan State leh District Hospital hrang hrangah te an mamawh dan-a sem turin State Planning Board Vice Chairman H. Rammawi chuan Health & Family Welfare Department kutah a hlan a. He hunah hian State Planning Board Vice Chairman chuan Mizoram chu COVID-19 dona kawngah ‘Hnam anga tangrual ber kan ni ang’ tiin, hripui dona tura hmalakna bakah National Digital Health Card Programme pawh Mizoram a kalpui a nih ve thuai theih nan chak zawka hma la turin Health Department chu a fuih bawk. Heng bungrua te hi Health Department aiawhin Principal Director F. Lianhlira chuan a dawng a ni.

DISHA thutkhawm nei

Central sawrkar sum hmanga hmasawnna hnathawh hrang hrangte enzuitu District Development Co-ordination & Monitoring Committee (DDCMC/DISHA) chu nimin khan Champhai-ah an Chairman Lok Sabha MP C. Lalrosanga leh Co-Chairman Rajya Sabha MP K. Vanlalvena te hovin an thukhawm a. He hunah hian Champhai District-ah MGNREGS Job Card 17,503 a awm mek thu te, kumin ah ni 61 inhlawhna siam a nih tawh thu te, PMA-Y (G) hnuaiah mi 165 ten In sak tanpuina dawngin In 146 sak zawh a nih tawh thu te, Jal Jeevan Mission hmangin khaw 7-an Tui lakna kalpui mek a nih thu te, PMGSY hnuaia kawng 21 siam turah 16 chu zawhfel a nih thu leh hmalakna dang dang te tarlan a ni bawk.

High Court Judge-ah ruat

   Mizo Hmeichhia te zinga High Court Judge hmasa ber ni turin Marli Vankung chu nimin khan ruat a ni. Kumin September thla tir khan Supreme Court Collegium chuan High Court Judge tur hian ramchhunga mi 68 te chu a lo rawt tawh a, hemi ang hian nimin khan India President chuan High Court Judge tur mi 17 te hi ruatin an zingah hian Marli Vankung hi a tel a, Mizo hmeichhia zinga High Court Judge-a hmasa ber tur leh Mizo zinga a 4-na tur niin Gauhati High Court-ah Addl. Judge hna chelh dawn a ni.