Budget pawnlam atanga hmuh a ni tlangpui tih sawi

Information & Communication Technology (ICT) changtu Minister Robert Romawia Royte chuan ICT Department hnathawhna sum chu State Budget pawn lam atanga hmuh a ni tlangpui tih Assembly House a hrilh.

Nimin-a Assembly Session neih ah MNF Member Dr. K. Pachhunga zawhna kal zel a ZPM Member Dr. Vanlalthlana leh CLP Leader Zodintluanga Ralte te zawh belhna chhangin ICT Minister Robert Romawia Royte chuan, State Budget-a ICT dDpartment tana sum dah aia tam daih hnathawhna tur sum an hmuh thu a sawi a, ICT chu Department te ni mahse theihtawp an chhuah ve thin tihte a sawi bakah an hnathawh tlangpui chu State Data Centre enkawl te, MINECO-a Internet Connection enkawl te, Department hrang hrang website enkawl te, Computerization of Government Offices te, Common Service Centre (CSC) hrang hrang enkawl te, IT Education for All kalpui, IT Infrastructure enkawl leh Mobile leh Internet Service lo thlithlai te a nih thu a sawi bawk.

Robert Romawia Royte chuan, India hmarchhak State zingah Mizoram chu Online hmanga University exam kalpui thei awmchhun nia a hriat thu a sawi a, Online hmanga University exam buatsaih tum a nih lai khan a hlawhtlin loh hlauin a lo zam ru viau tih a sawi a, hlawhtling taka exam kalpui theih a ni chu hemi kawnga thawktu zawng zawng te thawhrimna a nih thu leh chhuanawm a tih thu a sawi rualin, Online hmanga exam buatsaihah Internet Connectivity kawnga harsatna awm erawh pawh a tih thu a sawi a, harsatna tawk zirlai leh zirlai nu leh pa te chungah House kaltlangin hriatthiamna dil a, Online exam hlawhtling taka neih a nih theih nan ICT lam pawhin Task Force te dinin theihtawp an lo chhuah ve tih a sawi bawk.