MLA in Saitual to Saichal road siam mek enfiah

Lengteng bialtu MLA, L. Thangmawia chuan nimin khan Saitual atanga Saichal panna NH-102B siam hna (Blacktop) kalpui mek chu a hmunah kalin a enfiah.

Human Resources Development Board Vice Chairman ni bawk, L. Thangmawia hian kumin kumtir lam khan chanchinbu mite nen he kawng siam mek hi an lo enfiah tawh a, he hna enkawltu National Highway & Infrastructure Development Corporation Limited (NHIDCL) leh Contractor-te chu tha taka thawka, huntiam chhunga hna zo hman turin a lo chah tawh a ni. Nimin-a helai hmuna hnathawh a enna ah hian bialtu L. Thangmawia chuan Mizoram Sawrkar enkawl kawng siam hna vilpui tura YMA nena inremna siam tawh piah lama Central Sawrkar hnuaia Company hnathawh mek enpui hna YMA-in tlawm-ngaia an lo thawk chu neitu rilru atanga lo chhuak a ni, a ti a. Chawl lova thawhhopui zelah a sawm nghal bawk.

He kawng siam meka duhthusam lo lai deuh hi tualchhung Contractor, Mizote chan chhung a ni deuh zel a, heng hna hi Vai Company lian ten hneh zawk leh tha zawka direct-a an thawh theih a nih laiin, ram leilungfate kut-a a hlawkna lut tur duhin, Phase hrang hrang 5-ah then a thawh tir an ni a, tualchhung miin an hna chanlaia sawisel tur a awm hi pawi a tih thu sawiin, a tha tawklo laite hi siamtha leh vek turin L. Thangmawia hian tualchhung contractor-te a hrilh bawk a ni.