Latest News

Agriculture Minister in Serchhip DAO Staff kawm

Serchhip-a rawn kal Agriculture Minister, C. Lalrinsanga chuan Zirtawpni tlai khan Serchhip District Agriculture Officer (DAO) Office tlawhin DAO Office-a thawktute bakah FOCUS leh ATMA hnuaia thawktute nen inkawmna an nei.

Serchhip DAO Complex Farmers Training Hall-a he inkawmhona hunah hian Agriculture Minister, C. Lalrinsanga chuan Serchhip DAO hnuaia thawktute chu chibai bukin, Mizoram in ei leh bar kan intodelh nan Agriculture Department a thawktute chu an thiamna leh theihna hmanga tan la thar zel turin a fuih a, an hmalakna kawngah mamawhna leh harsatna an neih chuan Agriculture Minister anih anga theihtawp a chhuahpui thin dawn thu a sawi a ni.

Agriculture Minister chuan mithiam (Scientist) te hnen atanga thurawn a dawn te zingah Tualto thlai te zingah kan ram-a Telhawng chu intihcherna leh thau chhia paihna tha tak anih thu a sawi a, hei vang hian chin pun atan a chi tur lo sengkhawm lailawk tan a sual loh a rin thu a sawi bakah Zorin Bean leh Sacha Inchi pawh tun aia uar zawk chin chhoh zel anih tur thu a sawi bawk.

He inkawmhona hun hi Serchhip DAO, C. Lalnithanga chuan kaihruaiin DAO Office-a thawk te, ATMA hnuaia thawkte leh FOCUS hnuaia thawktute inhmelhriattirna hun hman a ni a, Serchhip District Agriculture Officer (DAO) Office hnuaiah hian thawktu 67 awmin DAO Office-ah mi 15, ATMA hnuaiah mi 10 leh FOCUS hnuaiah mi 42 te an ni. He inkawmhona ah hian Project Director, Agriculture Technology Management Agency (ATMA) Serchhip, District Management Unit (DMU) FOCUS leh District Agriculture Office Serchhip atangte in Serchhip District chhunga Loneitu leh Kuthnathawktu te tana an hmalak tawhna leh hmalakna kal mek te ngaihthlak a ni a, hmasawn zel dan tur te pawh sawiho a ni bawk.

Comments

Popular News (Last 30 Days)