Kar khat awh Training tan

Serchhip District khaw hrang hranga FOCUS hnuaia Community Animal Health Workers (CAHWs) te tan ni 5 awh tur an hnathawh dan tur zirhona chu nimin khan Serchhip-ah neih tan a ni.

Serchhip P&E Veng YMA Hall-a he Training hawnna hi Serchhip DVO, Dr. C. Zar-zokima chuan kaihruaiin Community Animal Health Workers (CAHWs) kalkhawmte chu an enkawl khaw tina ranvulhtuten hlawk taka ran an vulh theih nana tanpuitu leh kaihruaitu an ni tih hrilhin, an hriattur tul pawimawh te chu chiang taka hriat tum turte, a taka tih a tul hunah pawh hlawhtlin ngei tum tlat turin a fuih a. An inpekna in nasa takin rah a chhuah thei tih hriaa, theih-tawp chhuah tura fuihin, hmanrua an dawn turte a sem nghal bawk.

Nimin-a he Training ni hmasa berah hian Serchhip DVO Office-a Chief Veterinary Officer, Dr. R. Lalmakthanga chuan ranvulh dan kalphung leh kan nunna atana an pawimawhna tih thupui hmangin kalkhawmte hi zirtirna a pe a. Dr. H. Lalruatfela, Technical Officer, DMU, FOCUS te, Dr. Francis Lalrinmawia Sailo, DMU, FOCUS te, Dr. H. Ramsangzela, DMU, FOCUS leh Dr. Lalruatfela Sailo, Animal Husbandry Manager, ten thupui thlan bik hrang hrang hmangin zirtirna an pe bawk.

He Training hi tunkar Zirtawpni thleng neih tura ruahman niin Training neih chhung hian ran damdawi pek dan leh thil pawimawh dangte a taka tichhin zel chungin an zir dawn a ni.