MPCC in thu diklo tih sawi

Mizoram Pradesh Congress Committee (MPCC) chuan Village Council leh Local Council inthlan lo awm turah rorelna chelh mektu MNF party in an Party Candidate te an thlantlin chauhin khua leh veng tan hmasawnna leh hamthatna a awm dawn anga an sawi chu a diklo tih an sawi.

Inrinni-a Aizawl Press Club-a thuthar theh-darhtute a kawmna ah MPCC thupuangtu, Dr. Lallianchhunga chuan VC-ten hmasawnna hna an thawh nan Central 15th Finance Commission chuan kum 2020-2021 chhung atan Village Council te hman tur, Rural Local Body Grant cheng vbc. 93 chu Mizoram a pe tih sawiin, hei hi Ruling leh Opposition VC-ah rualkhai taka sem tur niin a sem rual dan tur pawh Finance Department in tehfung a siam angin, VC zawng zawngin mipui an neih tam dan milin an chang vek dawn tih a sawi a, LAD Minister thupeka tihdanglam mai mai theih a ni lo tih a sawi.

MPCC thupuangtu chuan Mizoram State Finance Commission (MSFC) hmasa ber rawtna ang chuan State thawhchhuah (Annual State Own Revenue) atanga 15% chu tualchhung sawrkar (Local bodies- ADC, AMC & VC) te chanvo tur a ni tih pawh sawiin, “Hetiang hi a nih mek laiin kum 2019-2020 leh 2020-2021 LAD Budget-ah Village Council te’n hma-sawnna an thawh vena tur pawisa, Major Works ah cheng khat mah MNF sawrkar hian a dah lo a ni,” a ti bawk.

Dr. Lallianchhunga chuan khawtlang hmasawn nan rorellai Village Council/Local Council neih kher a ngai lo tih sawiin, khua leh Veng hmangaihtu leh mi inpe neih a tha zawk tih a sawi a, “Sawrkar tha chuan rorellai leh eptu VC leh LC a enhrang tur a ni lo a, MNF party-in ruling Village Council duhsak bik tur anga an insawi a nih chuan sawrkar tha a ni lo a, mipui zahna an nei lo a, hnawl an ngai zawk tihna a ni,” a ti bawk.