Chanchin thar thenkhat :

Mobile application tlangzarh

COVID-19 chungchanga hriattur hrang hrang dahkhawmna, mCOVID-19 mobile application chu nimin khan ICT Minister, Robert Romawia Royte chuan a Pisa-ah a tlangzarh a, he application hi mcovid19.mizoram.gov.in atanga download theih niin he application atang hian COVID-19 a India leh Mizoram dinhmun bakah hemi kaihhnawih a thuthar te hriat theih a nih dawn bakah he natna dona atana CM Relief Fund pekna te leh tlawmngai taka COVID-19 do nana mahni a inpe te hming, thiamna, veng, khua te ziahluh theih a ni dawn bawk a ni.
FARMERS’ HELPLINE siam
Mizoram sawrkar-a Agriculture Department chuan COVID-19 avanga Lock Down leh Curfew chhunga Loneituten harsatna an neih thlenna tur, 'FARMERS’ HELPLINE' an siam thar a, Vawiin atang hian nitin chawhma dar 10:00 atanga chawhnu dar 2:00 chhungin 0389- 2311160 leh 0389 2328564-ah te biak theih a ni anga, Good Friday-ah erawh chawlh a ni thung ang. Agriculture (CH) Director, Rohmingthanga Colney chuan hun khirh tak kan tawh chhunga Loneitute mamawh- Thlai chi, Thlai damdawi, leitihthatna leh thildang te a khaihlak loh nan an harsatna tawh chu hotu sang lamah thlen niin a theih ang angin ruahmanna siam mek a ni tih a sawi a, District tina thuneitute leh Local Task Force Committee zawng zawngte pawh hrileng laka fimkhur tak chunga Loneitute hmakhua tur thlir a, thlai chi thlak leh loneih hna a khaihlak lohna tura fehchhuah phalsak tura ngen an nih thu a sawi bawk.
SWD hmalakna thlirho
Social Welfare Minister, Dr. K. Beichhua hovin nimin khan Aizawl-a a Office-ah Social Welfare Department-a Officer te chuan COVID-19 avanga National Lockdown hman mek chhunga an kaldan leh hmalak zel dan tur an sawiho a. He hunah hian Social Welfare Department enkawl Old Age Home, De-Addiction Centre, Rehabillitation Home leh Anganwadi Centre te chu central Sawrkar leh Supreme Court duhdan a enkawl anih thu tarlan niin thawktute leh Inmates leh beneficiary te an him thu pawh tarlan a ni a, ICDS project te tan nutrition chungchangah harsatna a awmloh leh State chhungah sem mek anih thu sawilan a ni. District tin-a One Stop Centre te pawh kar tluan-a darkar 24 chhung balhhlah awm lova kalpui a nih thu tarlan a ni.
Social Welfare Department hian an Department a thawktute Ni khat (1) hlawh tling-khawm Rs. 9,89,613/- chu Chief Minister's Relief Fund-ah thehluh relin nimin vek khan an theh-lut nghal bawk a ni.
I&PR Department in hlan
Mizoram sawrkar Information & Public Relations Department hnuaia Directorate leh District Office-a thawk te chuan COVID-19 avanga harsatna tawk te tanpuina turin nimin khan Chief Minister’s Relief Fund-ah an nikhat hlawh, Rs. 132,020/- chu an hlan a, I&PR Director Lallian-puii leh a thawhpui ten sum hi an hlan a ni.
Zu leh ruihhlo man hnem
Excise & Narcotics Department chuan March 22, 2020-a Janata Curfew puan a nih atanga tun thla ni 2 thleng khan Zu leh ruihhlo thahnem tak an man tawh tih sawiin, Zu litre 142.7, BEDC litre 2.8 leh Heroin gram 168.18 bakah Ganja gram 767 zet an man tawh thu an sawi bawk.

Comments

Chhiar Hlawhte