ZPM in Independent-a inthlan a chuh chhan sawifiah

ZPM Sr. Vice President, Dr. Kenneth Chawngliana chuan nimin khan thuthar thehdarhtute kawmin ZPM in Assembly inthlanpui neih tur Independent-a an chuh chhan a sawifiah.

Nimin a Aizawl Press Club-a thuthar thehdarhtute a kawmna hunah hian Dr. Kenneth Chawngliana chuan ZPM chu August 15, 2017-a indin \an chauh an nih thu sawiin, kum khat awrh chauha upa an nih thu leh an pawl chu Political Party hlun tak tak pahnih MPC leh ZNP te, ram vei pawl pali dang - Zoram Exodus Movement (ZEM), Mizoram People’s Party (MPP), Mizoram Democratic Front (MDF) leh Mizoram Reformation Front (MRF) te nen infinkhawm an nih thu a sawi a. MPC leh ZNP party-te chu Election Commission of India hnuaia Registration leh Recognition nei ve ve, an party hminga Election Symbol- te pawh nei ni mah se an pawl hming \heuh te thai bova ‘Zoram People’s Movement’ hming invuaha, pawl pakhata an inchhun fin tak avangin, anni pawhin chung zawng zawng chu chanin, pawl thar ZPM an nih tak thu a sawi a. ZPM chu General Election vawikhat mah la chuh lo a nih thu leh, tun inthlanna hi inthlan an chuh ve hmasakna ber tur a nih avangin, an pawl candidate-te pawh Independent-a kan chuhtir vek a ngai ta tih sawiin, Election Commission of India-in a tuk zat an neih hunah chauh Recognised Party, Reserved Symbol nei thei an ni dawn chauh tih a sawi bawk a. Hetiang ang deuh hian kum 1978 UT inthlan ah Congress Party leh kum 1987 State inthlan ah MNF te pawhin Independent-a inthlan an lo chuh tawh thu a sawi bawk.