Draft Agreement a\angin MBDPF inhnukdawk; Bru laklet hlawhchham phah ringlo

Mizoram Bru Displaced People Forum (MBDPF) General Secretary, Bruno Msha chuan, Tripura Camp-a Bru te Mizoram a laklet an nih na tura inremna (Draft Agreement) ziah ah MBDPF inhnukdawk mah se repatriation a hlawhchham phah an rin loh thu sawiin, "MBDPF inhnuhdawhna hian repatriation neih turah kawngro a su lo ang," a ti.

MBDPF General Secretary, Bruno Msha hnen a\anga thudawn danin, Bru lakletna tura inremna (Draft Agreement) ziah chu relief camp a awm mek Bru mi engemaw zatin an dodal avang leh agreement a\anga inhnukdawk tura nawrna a nasat avangin niminpiah khan MBDPF te chu an inhnukdawk a, hemi vang hian Bru mi thenkhat lungawilohna lantir te pawhin an chawnghei an titawp nghal a, tunah chuan boruak pawh a pangngai leh rih niin a sawi.

Zawhna chhangin Bruno Msha chuan, Draft Agreement a\anga MBDPF an inhnuhdawh avangin Bru laklet tur chu a hlawhchham phah an rin loh thu sawiin, he an inhnuhdawhna hian repatriation neih turah kawngro a sut an rih loh thu a sawi. "Mizoram sawrkar hmalakna in Mizoram a hruaikir tur Bru chhungkaw engemawzat an awm turah kan ngai a, chung zingah chuan MBDPF hruaitute pawh kan tel ang," a ti.

Ministry of Home Affairs, Mizoram sawrkar, Tripura sawrkar leh MBDPF te chuan Relief Camp a awm Bru te Mizoram a hruai kirna tura July 2, 2018 a New Delhi a inremna, Draft Agreement an ziaha lungawilo in Naisingpara, Hazacherra leh Asapara camp a awmte chuan July 16 a\ang khan lungawilohna an lantir a, an zing mi \henkhat chuan chaw an nghei chhunzawm a ni. Inremna duh lo turte hian September 30, 2018 ral hmaa Mizoram a hruai kir vekna tura inremna thuthlung chu \ha tawk lo ah an ngai a ni.

Draft Agreement a lungawilo te hian Mizorama an let huna an awmna tur hmun ruatah chhungkaw 500 vel a huhoa awmte, anmahni vengtu tur sipai (Para-Military force) dah te, an eizawnna tur ram chhungkaw pakhat tan hectare 5 \heuh pek te, anmahni chhawmdawlna tura chhungkaw tin tan Rs. 4,00,000 pek tur chu kum thum hnu a pek chhuah tura ti lovin, bank a pawisa dah luh dan pangngaia dah luhsak te, ei leh bara hma an sawn theih nan Development Council dinte an phut a ni.