46th Assam Rifles in 'NGOs Conclave 2018' buatsaih

Nimin khan Aizawl-ah 46th Assam Rifles te buatsaihin 'NGOs Conclave 2018' neih a ni a, he hunah hian 46th Assam Rifles Commandant, Col. Pratyus chuan nasa lehzuala Mizo mipui tan Assam Rifles ten hnathawh an tum thu leh, tlawmngai pawlte nen inpawh lehzuala thawhho an duh thu a sawi.

Loch House, 46th AR-a 'NGOs Conclave 2018'-ah hian Col. Pratyush chuan tunhma kum 20 chuang zet kaltaa Zokhawsang hmuna sipaite awmna tur ruahman \an a nih khan inremnaah Mizoram sorkar tih ve tur engemaw zat a awm a, chung zingah chuan kawlphetha pek te, kawng siamte leh tui pek te a tel thu sawiin, tun dinhmunah tihhlawhtlin loh a la awm nual avangin sipaiten Aizawl-a hmun laili an la luah reng niin a sawi a. Aizawl khawpui laili chep taka sipai inkhungkhawm ai chuan hmunhma zau leh nuam zawka khawsak chu an duh zawk nia sawiin, sipaite chu tirhna apianga lawm taka kal mai tur an nih thu a sawi.

Nimin a NGO Conclave-ah hian Central YMA, MFA leh MZP aiawhte telin heng pawl aiawhte hian thu an sawi a. Central YMA President, Vanlalruata chuan sipaite leh Mizo mipui inthlunzawm hnaih lehzual a pawimawh thu a sawi a, chumi atana thawhdunna tur kawng a tamzia tarlangin, thingtlang hmun kilkhawra chengte tana kawng hawn sak te, an hriselna leh zirthiamna lam hmasawnna tur ngaihtuah sak kawngah te sipaiten tha an thawh theih tur thu te a sawi a. Mizo \halai tam tak, hmundanga kal chhuak tur, \awng thiam silo te zirtirna kawngah pawh Assam Rifles te an tangkai theih tur thu a sawi bawk. He hunah hian MFA leh MZP aiawhte pawhin thu an sawi bawk.

Assam Rifles hi kum 180 zeta upa an ni tawh a, khawvela Paramilitary Force upa ber niin, 46th Assam Rifles bik hi Assam Rifles zingah chuan a naupang ber, kum 12 chauha upa an la ni thung.