MoS thar atan Vanlalawmpuii Chawngthu lakluh leh a ni

Mizoram Larsap, Lt. Gen. Nirbhay Sharma chuan nimin tlai khan Hrangturzo bialtu MLA, Vanlalawmpuii Chawngthu chu Minister of State ni turin rinawmna thu tiam tirin a lalut.

Nimin a Minister thar lakluhna hun hi Raj Bhavan Multipurpose Hall-ah neih a ni a, he hunah hian Larsap chuan Hrangturzo bialtu MLA, Vanlalawmpuii Chawngthu hi rinawmna thu tiam turin a lalut a ni. November Ni 25, 2013-a Mizoram Legislative Assembly inthlanpuiah khan MPCC President leh Chief Minister, Lal Thanhawla chu 26-Serchhip (ST) leh 28-Hrangturzo (ST) Assembly Constituency-ah te thlantlin a ni a. Hrang-turzo bial a chhuahsan tak avangin April ni 11, 2014 khan Hrangturzo Assembly Constituency-ah by-election neih a ni a. Vanlalawmpuii Chawngthu hian a khingpui awmchhun chu hnehin May ni 16, 2014 khan tling a puan a ni. Kum 1987 hnua Mizo hmeichhe MLA hmasa ber leh Mizoram Legislative Assembly 7-na a hmeichhe awmchhun ni turin Speaker, Hiphei chuan May ni 20, 2014 khan rinawmna thu tiam tirin a lalut a ni.

Vanlalawmpuii Chawngthu hi Minister hlui C. Chawngkunga leh Lalliankimi Sailo te fanu niin, zirna lamah MA (Political Science) a ni a. Tunah Mizoram State Commission for Women Chairperson niin, Mizoram Pradesh Youth Congress Committee (MPYCC)-ah President nihna a chelh mek bawk a ni. September Ni 20, 2017 (Nilaini) khan Aizawl South-III bialtu MLA, KS. Thanga chu Minister of State atan lakluh a lo ni tawh a. Vanlalawmpuii Chawngthu nen hian Chief Minister, Lal Thanhawla kaihhruai sorkar ah hian Council of Minister 12 an ta a ni.

Vanlalawmpuii Chawngthu hi Mizoram sorkar-a Hmeichhia Minister pahnihna a ni a, kum 1987-a Laldenga kaihhruai MNF sorkar-ah khan Lalhlimpuii chu Minister a lo ni tawh a, hemi a\anga kum 30 a liam hnu, kum 2017-ah Mizoram chuan Minister atan Hmeichhia a nei leh ta chauh a ni.