Mizoram NGO Coordination Committee hruaitu ten Election Commission-a hotute an kawm

Mizoram-a tlawmngai pawl hrang hrang telna- NGO Coordination Committee chuan niminpiah tlai khan Chief Election Commissioner (CEC) leh Election Commission of India -a hotute dangte chuan Joint Meeting an nei.

New Delhi-a cham mek NGO Coordination Committee aiawhte hian nimin tlai khan New Delhi-a Election Commission of India Meeting Hall-ah Election Commission of India-a hotute nen Joint Meeting an nei a, he hunah hian Election Commission of India a\angin Chief Election Commissioner, AK. Joti leh Election Commissioner pahnih OP. Rawat leh Sunil Arora bakah Election Commission of India Official pali (4) an tel a, NGO Coordination Committee Aizawl a\angin Central YMA President, Lalbiakzuala leh Treasurer, J. Lalsailova; MZP a\angin an President Lalsangzuala Ngente leh General Secretary, L. Ramdinliana Renthei bakah Fin. Secretary Lalkhawngaihzuala te an tel a, heng mite hi Delhi Mizoram House-a ARC, David Lalthantluanga chuan a \awiawm bawk a ni.

He Joint Meeting-ah hian NGO Coordination Committee chuan kum 2014-a Member of Parliament (MP) inthlan dawn ah Tuikuk, anmahni duh thu a Mizoram chhuahsantu ten Transit Camp, Tripura a\anga vote an thlak \hin duhloh nana lungawilohna an lo lantir tawh thu sawiin, ‘Mizoram in kum 2018-ah State Legislative Assembly inthlan kan neih tur leh MP Election 2019 lo awm leh turh Election Commission of India in kum 2014-a alo intiam tawh angin Election Commission hian engtin nge hma a lak dawn?’ tih an zawt a. NGO Coordination Committee chuan Tuikuk anmahni duh thu a Mizoram chhuahsan tute chu vawi tam tak Mizoram chhunga lut tura an ngen tawh thu leh Mizoram-ah an lolut duhlo a nih chuan Tripura state ah awm hlen a, vote te pawh thlak nghal tir mai turin an ngen a ni.

NGO Coordination Committee chuan eng Election-ah pawh Tuikuk te chu State pawn a\anga vote thlak an rem tih tawh loh thu leh Mizoram chhung a\anga vote an thlak thei dawn a nih chuan an dodal loh thu an sawi a. Chief Election Commissioner, AK. Joti chuan NGO Coordination Committee te thu thlen chu anmahni lam a\ang chuan dik a tih thu sawiin, Ministry of Home Affairs te nen an lo sawiho leh tur thu leh a \ul angin hma an lo lak tur thu a sawi bawk.

NGO Coordination Committee te hian nizan hmasa khan Dr. Vinay P. Sahasrabuddhe, Member, Joint Committee on the Citizenship Amendment Bill 2016 chu an hmu leh bawk a, Citizenship Amendment Bill 2016 chungchang sawipuiin, NGO Coordination Committee leh All Political party Mizoram ten Memorandum an siam copy chu an pe bawk a. Joint Parliamentary Committee on Citizenship Amendment Bill 2016 ten India State \henkhat an tlawhkual huna Mizoram-a lo kal ve turin an sawm bawk a ni.