Mipui kaltlanga Pathian rawngbawlna a ni tih hriain Parliamentary Secretary te ruat an ni - Lal Thanhawla

MPCC President, Lal Thanhawla chuan intih lalna leh sum siamna ni lovin mipuite kaltlanga Pathianrawngbawlna a ni tih hria in, chutiang avang chuan Parliamentary Secretary te chu ruat an nih thu a sawi a. “Kan ram sahthlak tumna a awm chuan huaisen takin a tawp thlengin kan \ang tur a ni,” a ti bawk.

Mizoram Pradesh Congress Committee in nimin a Aizawl Congress Bhavan-a Political Session an neih ah Chief Minister ni bawk, Lal Thanhawla chuan thu sawiin tunhnaia Parliamentary Secretary te banna chungchang a sawi a, Chief Minister chuan zahawm takin sorkar kal se an duh thu leh an Minister te pawhin puitu \ha tak tak neiin an department kalpui thei se an duh tih sawiin, “Kan dinhmun hi intih lalna leh sum siamna ni lovin mipuite kaltlanga Pathian rawngbawlna a ni tih hriain, chutiang avang chuan Parliamentary Secretary te hi kan ruat a ni,” a ti. Mi State-ah chuan an MLA, Minister ni ve lo te intih lungawi nan an ruat mai mai nia sawiin, State \henkhatah phei chuan portfolio pawhin a daih lova, Chief Minister Office-ah te an \hu mai mai a, Mizoram-ah chuan a ni ve lo tih a sawi bawk. Chief Minister chuan Parliamentary Secretary-te bannaah hian \hang\hat lak tum an \hahnem hle nia sawiin, ‘Ban turin lehkha kan thawn vang a ni’ ti te pawh an awm ni awm in a sawi a. MNF lam pawhin an zinga mi in term hmasa lama Court lamah a hekna kalzel vang a ni a lo ti bawk nia sawiin, “Heti tak hian kan sorkar min lo ngaihtuah pui a ni tih pawh ka lo hre lo zawk a, \hang\hat lak tumna a nep hle chuan \hang\hat lak tumte pawh hi an ropui vak lo tihna a ni,” a ti.

Chief Minister, Lal Thanhawla chuan lawm taka dinhmun a\anga ban chu har tak a ni tih sawiin, chutih laia Parliamentary Secretary-te lawm tak leh hlim taka party tih chak nana bang a, an dinhmun an kalsan chu a chhuang hle tih a sawi a. “Remna leh muanna atan 1986 June ni 30 zana lal\hutthleng kian a remna kan han ziah pawh khan, ‘Kan term tawp dawnah nise,’ ti te pawh kan awm, mahse kan hreawm tawrhna kha a tawp kan duh tawh avangin lawm chungin kan bang a, kan hotute leh kan party in malsawmna kan dawn phah a, \um 5 lai sorkar min siam tirin chutiang ti thei party chu Mizoram-a awm chhun kan ni ta a ni,” a ti bawk.

MPCC President ni bawk, Lal Than-hawla chuan tunlaia boruak chungchang sawiin political party-ten Chakma candidate neih loh tur tih te pawh nei lo vek mah sela India khua leh tui an nih avangin independent talin an ding dawn tho tho a, Chakma MLA an awm tho tho dawn tih sawiin, nakin ah phei chuan sorkar siamna atana \angkai ‘King maker’ te pawh an la ni thei tih a sawi a, kan la intlawn siak vak lovang tih pawh a sawi theih loh tih a sawi a. “Chuvangin fimkhur takin kan politics kal kawng hi kan chhut a ngai. Kan ram sahthlak tumna a awm chuan huaisen takin a tawp thlengin kan \ang tur a ni a, chuti ni lova tute emaw pawi kan khawih a, an mit note kan khawih sak chuan thil pawi a thleng thei, hnunglam a mit nei ang maiin kan awm reng a ngai. Mizo zawng zawngin kan hotute hmathlir tih hlawtlin nan engin nge kan thawh ve ang kan ti zawk tur a ni,” a ti bawk.

Nimin a Congress Bhavan-a inkhawm ah hian Assembly Deputy Speaker, R. Lalrin-awma chuan Parliamentary Secretary pasarih te banna chungchanga dan leh hrai nen a inkaih-hnawih dan sawiin, MLA pasarih te’n banna an thehlut chu fakawm a tih thu a sawi a. “An duh loh chuan bang lo thei an ni. Court-ah khing let se, Court a thubuai a awm chhungin an term pawh a tawp daih thei a, nihna duh vang hrim hrima sawi buai lova banna an thehlut hi an fakawm thlawt a ni,” a ti.

He hunah hian MPCC President hian Congress party chanchinbu thlakip chhuak tur ‘Congress Thlifim’ tih chu a tlangzarh nghal bawk a ni.