MBBS Seat tih tlem MZP in an hrethiamlo tih sawi

MZP chuan Central Pool Quota-a Mizoram state MBBS seat kum dang aia tlem Union Ministry of Health & Family Welfare in min pe chu an hrethiam lo tih sawiin, Central sorkar in Mizote min hmuhsitna-ah an ngai tih an sawi.

Hemi chungchanga nimin a thuchhuah an siamah MZP General Hqrs. chuan Mizoram State hian Central Pool quota hi kumdangah chuan seat 25 te, 26 te leh 27 neih chang te kan nei \hin nia sawiin, kumin 2017-2018-ah hian Central Pool quota-ah Mizoram hian MBBS hi seat 17 (sawm pasarih) chiah kan hmu a, kumdang aiin kumin hian seat 8 in min pek tlem bakah Mizoram seat min pek te hi Medical College-ah pawh ranking hniam te te a nih thu sawiin, ‘Eng vanga Mizoram hi Seat min pe tlem nge?’ tih chu sorkar laipui an zawhna a nih thu an sawi.

MZP thuchhuah chuan Mizoram in MBBS kan mamawh em em a kan buai luai luai laia Central sorkarin MBBS seat min lo tih tlem sak chu an hrethiam lo hle tih sawiin, “Hetiang zela sorkar laipuiin Zofate hi min enkawl a, keini aia ngaih pawimawh a nei zel dawn a nih chuan kan hnam hmakhua ngaihtuahna avangin Zofate mamawh min ngaih pawimawh sak thei tu tur China sorkar te pawh a\ul chuan biak mai hi MZP chuan a hreh dawn lo a ni,” tiin an thuchhuah ah chuan an tarlang.

Sorkar laipui Union Ministry of Health & Family Welfare in MBBS seat kumdang aia seat 8 ngawt a min pek tlem avanga seat ngai kan neih letleh theih nana Mizoram sorkarin rang taka hma a la nghal chu lawmawm an tih thu sawiin, hemi chungchanga Chief Minister, Lal Thanhawla'n Union Health Minister hnena lehkha a thawn te, Mizoram in MP kan neih ten hma an la nghal te leh Higher & Technical Education Minister leh Commissioner ten hma an la nghal chu lawmawm an tih thu an sawi a, hlawhtlinna chang ngei tura a tawp thlenga hma la tura an beisei thu an sawi a. MBBS seat tam zawk kan neih theih nan MZP chuan hma an la chhunzawm zel dawn tih sawiin, MBBS seat tam zawk Mizoram in kan neih theih nan Prime Minister, Narendra Modi leh Union Minister of Health & Family Welfare, Jaggat Naddate hnenah lehkha a thawn nghal bawk.