Bru laklet hun atan kumin kumtawp lam rawt a ni

Sorkar laipui-in kumin kumtawp lam, khaw hul huna Tripura Relief Camp 6-a awm Bru ho laklet hna thawh a rawt.

Home Department hotute sawi danin tunhnaia Mizoram tlawha lo zin Ministry of Home Affairs a Adviser (Bru), Mahesh Kumar Singla chuan Mizoram sorkar hotute nena an inkawmna-ah Bru laklet hna thawh leh chungchang hi a sawi chhuak a. Singla hian Bru laklet lehna hun atan hian November thla bul lam tinzawn nise tiin a rawt a. Mahse, Official taka rawtna siam erawh chu a la awmlo nia thudawn a ni.

Home Department thuneitute chuan Bru laklet hna hi kalpui a nih dawn chuan a hma lama ruahmanna (road map) siam sa anga kal leh mai a nih tur thu an sawi a. A taka kalpui tur chuan pawisa pek bakah sorkar laipui-in tih hmasak tur tam tak tih loh a la nei niin an sawi a. Chu bakah tunhma lama vawi engemaw zat kokir tura ruahmanna siam a nih pawha an lokir duh tawh loh avangin a lo thlawna hun leh tha leh sum senralna mai mai a nih leh theih thu an sawi a ni.

Tunhma-in Bru lakletna atan hian ruahmanna siam a lo ni fo tawh a, Bru hruaitute’n chhuanlam hrang hrang an siam thar zel avangin an lokir duh \hinlo niin Home Department hotute chuan an sawi a. Nikuma laklet tura ruahmanna pawh tih khawtlai a nih hnu-ah Supreme Court-a sorkar laipui leh Mizoram sorkar khinga thil ngiat thar an neih leh avangin a puitling ta lo a ni, an ti bawk.