Serchhip Tuikhuah Veng-a NH. 54 lei tlahniam PWD (Highway) Chief Engineer in a rawn tlawh

Nimin khan Serchhip Sub-Hqrs. YMA Vigilance & Monitoring Committee te sawmna angin PWD (Highway) Chief Engineer, K.Sawmvela chuan Serchhip a rawn tlawh a, Tuikhuah Veng leh Dinthar Veng-a National Highway-54 a lei tlahniam (Sinking area) leh Sesah lui paltlang a NH-54 kawng chhia te a en a, lei tlahniam zelin harsatna a siam theih te Sub-Hqrs. YMA hruaitute leh Serchhip-II Village Council hruaitute, Dinthar Branch YMA leh S. Kawnpui South Branch hruaitute nen an sawiho bawk.

PWD (Highway) Chief Engineer, K.Sawmvela hi Sub-Hqrs. YMA Vigilance & Monitoring Comtt. ten an Chairman, Kapliana Pachuau hova lo dawngsawngin, Tuikhuah Veng leh Dinthar Veng a National Highway tlakhniamna hmun leh Sesah lui paltlang NH-54 siam\hat dan turte a hmuna an enho hnuah Serchhip Bazar a Sub-Hqrs. YMA Office ah hmalak zeldan tur te an sawiho zui lehnghal a, he hunah hian Geology & Mineral Resources Department Director, Lalhmachhuana pawhin a telpui a. He hunah hian Serchhip Tuikhuah Veng leh Dinthar Veng National Highway 54 a lei tlahniam (Sinking area) chu kuminah pawh inches 2 (hnih) vela a tlakhniam belh thu leh reilote ah a mual tawlha a tawlh mai theih a nih thu te, a chhan nan tui luankawr \ha tak leh a thlang kawr ruamah Check Dam 4/5 vel siam nise tiin, Geology & Mineral Resources Department Director, Lalhmachhuana chuan aranglama a zirchiang tur Geologist rawn tirh a tum thu leh chuta an Finding Reports chu PWD (Highway) Chief Engineer hnena an thehluh tur thu sawiin, K. Sawmvela chuan Ministry of Road, Transport & Highway Chief Engineer, North East Region a\anga sum dilchhuah a lo tum tur thu te a sawi a, a ranglamin PWD (Highway) lamin Engineer rawn tirin Estimate leh Drawing an siam dawn bawk a ni.

He bakah hian Sesah lui-a National Highway-54 chhe lutuk pawh PCC hmanga siam\hat a nih theihnan hmalak a nih tur thu PWD (Highway) Chief Engineer hian a sawi bawk a, YMA lam ngenna angin heng lei tlakhniamna hmunah te hian tui luankawr \ha tak siam tuma hmalak a nih tur thu a sawi bawk.

Sub-Hqrs. YMA Vigilance & Monitoring Committee chuan New Serchhip Pioneer Camp hlui hmuna PWD (Highway) Circle Office tur Building an sak peih vek tawh luah thuai tura an ngenna chhangin Er. K. Sawmvela chuan, Aizawl Zemabawk RIPANS peng a\anga Tuipang inkar NH-54 hi PWD (National Highway) kut a\angin National Highway Infrastructure Development Corporations Limited (NHIDCL) kutah hlan a ni dawn a, he kawng hi cheng vbc. 6,000 zet senga laih zauh tura ruahman mek a ni a, chu kawng chuan Serchhip, Hnahthial leh Lawngtlai khua te hi a hel (By pass) dawn a, chuvang chuan National Highway in a paltlang loh khua a PWD (Highway) Circle Office lo hawn chu remlo hnuhnawha an hriat leh thu a sawi bawk.