Computerised Bill avanga harsatna thleng lo hrethiam turin P&E Deptt. in mipuite an ngen

Serchhip-a Power & Electricity Department chuan Computerised Billing chu Serchhip Town chhungah thla kalta a\ang khan an hmang \an a. Hemi avang hian Bill semchhuah chungchangah harsatna thleng mekin mipuite lo hrethiam turin an ngen.

Hemi chungchanga Serchhip-a P&E Department-a JE, Lalneihkima sawi danin Computerised Billing hi April thla a\angin Serchhip Town area-ah hman \an a ni a, hei hi hetiang an hman vawikhatna niin Serchhip Power Division-a thawktute pawhin an enkawl vawikhat a ni bawk a. Hei vang hian tihsual palh leh lo chhut sual palh a awm theih thu sawiin, \umdang ang lo taka Bill lo sang ta em em leh lo hniam ta em em a awm theih thu an sawi a, hetiang alo awm a nih chuan sawisel mai lova an hnena hriattir turin an ngen a ni.

P&E Department hotute sawi danin, tuna Computerised Billing tur hian kum 2013 khan Company lamin survey lo nei tawhin tunah hian hmanrua an rawn dah te chu an fit fel thawkhat tawh a, amaherawh chu Internet hmanna tura Modem-ah duh anga la \ha tawklo a awm avangin karleh lam khi chuan a nih dan tur anga kalpui theih a nih tawh an beisei thu an sawi a ni. Computerised Billing System-ah hian Meter Reader ten In tina Kawlphetha hman zat an lakkhawm chu Computer-ah chhu lutin Software an dah hmangin Bill chawi tur zat hi a rawn inchhutchhuak anga, hei hi Printer hmangin Bill Body siamsa a rawn in print thei dawn a ni.

Bill Copy hi semchhuakin Bill pekna Counter 4 awm tura ruahman ni mah se tunah hian Counter pathum (3) chiah hman theih tura peihfel ala ni dawn a, hei vang hian New Serchhip lama Electric Bill pekna siam \hin chu tihtawp lailawk a ni rih dawn a, P&E Veng-a Electric Department Office-a Counter pathum siam ah Bill hi pek a ngai rih dawn a, New Serchhip Counter-a Bill pekna siam leh tur hian hmalak mek a nih thu thawktute chuan an sawi bawk a ni. Electric Bill leh a kaihhnawih a harsatna nei ten an complaint enfelna turin JE Room-ah Computer pakhat dah a ni bawk.

P&E Department hotute chuan hetianga ruahmanna thar kalpui a nih avang hian Electric Bill pawh \umdang aiin mipuite hnenah an semchhuah tlai thu an sawi a, tunhma lama thla tin ni 21 a\anga Reading an neih \hin chu he ruahmanna an kalpui a\ang hi chuan thla tin ni 1 a\angin Reading hi neih a nih tawh dawn thu an sawi a. Hemi avang hian tunah hian Veng tam takah Electric Bill semchhuah theih ala nih loh thu sawiin, mipui te chu lo chi-ai mai lo turin an ngen a, a rang thei ang bera semchhuak tura hmalak mek a nih thu leh lo hrethiam hram tura an ngen thu an sawi bawk.