Serchhip-a Lecturer sawn duhlo

MZP Hqrs. Mamit chuan Govt. Mamit Col-lege-a Assistant Professor pakhat chu thlaktu awmlo a Govt. Serchhip College-a sawn tum a nih avangin nimin khan Assistant Professor sawnna tura Order chu Mamit-ah an hal.

Mamit Tennis Court-a he hun hmanna ah hian MZP Hqrs. Mamit President, Lalropuia chuan Govt. Mamit College in nasa takin hma a sawn zel tih sawiin, nikum lawkah NAAC in an endiknaah pawh an College chuan Grade B hmua an lawm hle thu a sawi a. Hetihlai hian Lalrinchhana, Assistant Professor Department of Education chu thlaktu awm lova Govt. Serchhip College-a transfer a ni ta mai chu pawi an tiin khawthlang zirlaite thamlohna leh hmuhsitna ah an ngai tih a sawi a. Lalrinchhana hi sorkar-in a thlaktu a ngaih-tuah a, an rawn dah nghal dawn a nih chuan Transfer Order hi sawibuai an tumloh thu leh a aiawh tur dah a nih dawn loh chuan Sorkar thuneitute hi Transfer Order hi hnukkir turin an ngen tih a sawi a. “Chutiang a nih loh chuan, thlaktu awm lova Govt. Mamit College Lecturer sawn hi MZP Hqrs. Mamit chuan engtik ah mah a remti ngai dawn lo,” a ti bawk.

MZP Hqrs. Mamit chuan Govt. Mamit College Lecturer te hmundangah transfer anni \hin chu pawi an tih thu sawiin, kum 2012-a Lecturer mi paruk (6) College hrang hranga an transfered pawh vawiin thleng hian an chhuahsan tak Mamit College-ah a nlo let leh tawh lova, an aiawh tu pawh vawiin thleng hian dah zawh kim an la ni chuang lo tih an sawi a. Hetiang thil hi hun kal tawhah an lo tawn tawh avangin, an dinhmun ngaiah bawk let leh chu an tum tawhlo tih a sawi a. Tun thla ni 6 thlenga sorkar in he Transfer Order hi a hnuhkir leh hnuhkir loh an ngaichang dawn tih pawh sawiin, huntiam chhunga an ngenna in awmzia a neilo a nih chuan a \ul ang zela hma an lak dawn thu an sawi bawk.