Adhaar Number leh Bank Account Number thlun-zawm chungchanga Campaign neih dan tur sawiho

Nimin khan Serchhip District Bawrhsap Pisa-ah District Bawrhsap Dr. Lalrozama, IAS hovin R. Ralkhuma, Chief Manager, Lead Bank leh District chhunga Bank hrang hrang Manager leh mi pawimawh ten Adhaar Number leh Bank Account Number thlunzawm chungchanga Campaign neih dan tur relin Special District Level Consultative Committee an nei.

Special District Level Consultative Committee \hutkhawm ah hian Bawrhsap, Dr. Lalrozama chuan sorkar laipuiin ram mipuite chu Adhaar nei vek tur leh an Adhaar number leh an Bank Account Number te thlun-zawm vek turin a duh tih sawiin, hei hi Bank kaltlanga sorkar \anpuina tinreng inpek nan leh ramchhung sum chevel fel zawka kalpuina atana tih a ni, a ti a. Adhaar Number nei tawhte chuan a rang lama hei hi an tih a \ul thu a sawi bawk. Adhaar enrolment kalpui mek dan pawh sawiin Bawrhsap, Dr. Lalrozama chuan, tunah hian Team pathum tirhchhuah mek niin Team pakhatin DC Office-ah ngawrh takin an kalpui mek thu a sawi a, March thla chhungin a tam thei ang ber Adhaar enrolment hi pek hman tum a nih thu a sawi bawk.

He hunah hian R. Ralkhuma, Chief Manager, Lead Bank chuan, mipuiten an Adhaar Number leh Bank Account Numberte an thlunzawm vek a \ul avangin Bank lama thuneitu sang zawkin Bank te chu khawtina mipuite hnena a hrilhhriatna (Awareness Camp) nei tura an beisei thu a sawi a, Serchhip District-ah pawh tun, March thla chhungin khawtinah neih hman an tum dawn thu a sawi bawk.

Adhaar leh Bank Account inthlunzawm nan hian mahni account neihna Branch ah inthlunzawm tir phalna Form (consent Form) dahkhah (fill up) a thehluh mai tur a awm a, chumi hmang chuan awlsam takin Adhaar Number nei tawhte tan tihfel mai theih a ni. Amaherawh chu Bank Account-a kan hming ziak dan leh Adhaar Card-a hming ziak dan a inan loh chuan thlunzawm theih a ni lo thung a, hetiang harsatna nei chuan hming siam\hat awlsam zawkna, Bank Account hming kha thlak/siam\hat hmasak phawt \hin tur a ni.

Nimin a Meeting-ah hian District chhunga Bank hrang hrangten an tlawh tur khua leh an tlawh hun turte an ruahman nghal a ni.