Aizawl City College Joint Students’ Union huaihawtin Aizawl-ah Zirlaite thlavang hauhin kawng zawh a ni

Aizawl City College Joint Students’ Union (ACCJSU) chuan an lo sawilawk tawh angin nimin khan Zirlai te thlavang hauhin Aizawl khawpui chhungah kawng an zawh a, kawng hi \huang hnihah zawhin Kulikawn leh Chanmari a\angin an zawh a, Vanapa Hall kawtah an intawkkhawm a ni.

He huna tel te hian au hla chi hrang hrang hmangin an thilphut te an puang a, Zirlaite diriam ching sorkar an duh loh thu te, Sorkar in an zirlaipui te zangnadawmna a pek an phut thu te, Mizo zirlai ten an dikna chanvo an duh thu te, an zirlaipui harsatna tawk mek te sorkar in ngaihsak tura phut na te, Zirna In hriatchian lo a sorkar in zirlai te an tirh an duh loh thu te, Zirlai awm \ha duhlo anga sorkar in a puh demna leh sorkar in zirlai te chunga ngaihdam dil tura an phut thu hmang te in an aurual a ni. Vanapa Hall kawt-a an intawhkhawmna ah thusawiin Aizawl City College Joint Students’ Union President, Zodinsanga chuan, zirlai ten an zirlaipui te thlavang hauha kawngzawh a ngai ta chu lungchhiatthlak a tih thu leh pawi a tih thu a sawi a, NIAS a zirlai harsatna tawk inhlawmkhawm ten hmalak pui tur leh an thlavang hauh tura an ngenna chu Executive Meeting in a ngaihtuah hnuah an ngenna chu bawhzui tlaka an ngaih avangin an zirlaipu te thlavang hauhin kawng an zawh ta tih a sawi a. Zirlaite chu hlimhlawp avanga pungkhawm an ni lo tih he thil a mawhphurtu hian lo hria se a duh tih sawiin, resolution an pass ang te sorkarin ngaihtuah zui sak se a duh tih a sawi bawk.

NIAS a zirlai C. Laltlanmawia pawhin thusawiin an chungchanga zawhna hrang hrang a dawn chu chhangin sorkar tihmualpho tuma hma la an nih loh thu a sawi nawn leh a, NIAS a an awm chhunga harsatna an tawh hrang hrang te sorkar official Level leh Minister, leh Chief Minister thlengin tihdan phung pangngaia a thlen hnuah hmalakna leh an tana beisei tur engmah a awm tak loh avangin hetiang dinhmun hi an thleng ta chauh a ni tih a sawi a, a hmalam hun thlir chunga a thawhrimna chu thawk leh khatah a chhe ta vek niin a sawi.

Human Right & Law Net Work hruaitu, Vanramchhuangi pawhin Mizoram Building & Other Construction Workers Welfare Board sum hmanga sorkarin zirna In tih tlakloh leh mumal lova Mizo \halai a tirh chungchanga inhnialna awm mek chu ACCJSU hmalakna in thudik puan chhuah a ni ta niin a sawi a. He thil a MZP leh MSU te an hai chung pawha hneh theihloh leh sum pawha lei theih loh, mahni zirlaipui te thlavang hauha zirlai tam takin kawng an zawh chu fakawm a tih thusawiin, hei hian ram tan thil \ha a puakchhuah ngei a beisei thu leh MBOC-WWB sum hman dan chungchang pawh enzui zel a nih tur thu a sawi. 

Hemi hnu hian zirlai pungkhawm te hian resolution an pass a, chung te chu- Mizoram sorkar in zirchianna mumal awm lova Mizo zirlai te hriatchian loh zirna In ah a tir chu pawi an tih thu leh tunhnuah thleng tawh lo se an duh thu te; Mizoram sorkarin a thil tihsual avanga Mizo zirlai ten harsatna an tawh mek laia sorkar hotu ten diriam zawnga \awngkam an chhuah chu an rilru a nat thu leh an dem thu te; Sorkar chu ngaihdam dil ngei tura an phut thu te; Sorkar in Mizoram pawna Mizo zirlai a tirh te ngaihven zui tawh tura an phut thu te; An zirlaipui exam duhte an duh ang ngeia an exam theih nana hma lakpui tur leh Certificate lem an dawng a nih chuan sorkarin mawhah laa an harsatna chinfel sak tur leh an hmalam hun ngaihtuah pui tura an phut thu bakah Mizoram sorkarin NIAS a Mizo zirlai a tirh te harsatna tawk sum tam tak an sen chu rul let ngei tura an phut thu te a ni.

Hemi hnu hian ACCJSU hruaitute hian Chief Minister, Lal Thanhawla chu a pisa-ah hmuh an tum a, Chief Minister hi an hmuh theih loh avangin tukin dar 9:00 a\angin CM Bungalow kawt-ah lungawilohna lantir an tum a, heta an la hlawhtlin loh chuan Total Band neih an tum a ni.