Serchhip-a Chapchar kut hmang turin ruahmanna siam fel a ni

Tunkar Zirtawpni-a Serchhip-a Chapchar Kut hmang turin ruahmanna peihfel a ni ta.

Chapchar Kut Or-ganising Committee in YMA Sub-Hqrs. Serchhip te Chapchar Kut hman dan tur lo ruahman tura an tih anga YMA Sub-Hqrs. in ruahmanna an siam te thlirin nimin khan District Bawrhsap hovin Organising Committee hi Serchhip DC’s Meeting Room-ah an \hukhawm leh a, he \hutkhawm a tel ten ruahmanna an siam angin Chapchar Kut hi March 7, 2014 zing dar 11:00-ah Leisekawt Mual-ah hman a ni anga, District Bawrhsap, Pi Juhi Mukherjee chu Kut thlengtu niin YMA Sub-Hqrs. Serchhip President, Pu RL. Chhuan-awma chu Kut Pa a ni ang. Kumin a Chapchar Kut hmanna ah hian Serchhip Town chhunga YMA Branch 21 tel tura beisei niin Mizo lam chi hrang hrang Tlang Lam, Solakia, Chawnglaizawn, Bualpui Cheraw, Kanluang, Mitthi Rawp Lam, Khuallam, Chheih Lam, Chai leh Mal Zai chi hrang hrang te leh thildang benglut tak tak entir a ni ang. Kumin a Chapchar Kut hmanna tur hmun hi DC Office leh leh YMA ten buaipuiin DRDA, PHE, LAD leh Fire Department te chu mawhphurhna pek an ni bawk a, mipuite tan Thingpuisen hang in tur buatsaih a ni dawn bawk a ni. Organising Committee Chairman, Pi Juhi Mukherjee, IAS chuan Chapchar Kut hmanna tur sum an dawn ang china senso khunglut hram tura ngenin, Sub-Hqrs. YMA, Serchhip in Chapchar Kut programme felfai taka an lo buatsaih leh ruahmanna \ha tak an lo siam chu lawmthu a hrilh bakah dan leh thupek kenkawh kawnga harsatna awm lo tura mipuite nungchang fimkhur vek tura a beisei thu a sawi bawk.