Lenkawl

CM hovin thutkhawm nei

Health Minister, Dr. R. Lalthangliana chuan COVID-19 laka invenna kawnga hmalakna leh inpuahchahna enfiah turin nimin khan Lunglei District leh Hnahthial District-te a tlawh.

Mizoram-ah inkharkhipna kalpui mek chu a thawh li-na atan kalpui leh tura ruahmanna siam a nih hnuah Lockdown 4.0 hi May ni 18, 2020 atanga May ni 31, 2020 thlenga neih a ni dawn a, nimin khan Mizoram Chief Secretary, Lalnunmawia Chuaungo hovin Lockdown 4.0 atana inkaihhruai dan tur bakah thil pawimawh dang chi hrang hrang an sawiho a ni.

Rampum-a inkharkhip kalpui a nih avanga Mizoram mi leh sa ramchhung hmun hrang hranga tangkhang te hruaihaw mek niin Tamil Nadu leh Puducherry atanga rawn haw te chuan nimin khan Bairabi Rail Station an lo thleng a, heng mite hi Mamit DC, Dr. H. Lalthlangliana hovin Medical Team, Liason Officers leh Police ten venhimna tha tak hnuaiah an lo dawngsawng a ni.

Mizoram sawrkar hnuaia Agriculture Development Board Team-II te chuan nimin khan Serchhip rawn tlawhin Mizoram Flagship Programme, Socio Economic Development Programme (SEDP) chungchang leh hmalakna tur inhrilhhriatna neih a ni a, hemi hnu hian Serchhip Zawlpui phai pawh tlawh nghal a ni bawk.

Rampum-a inkharkhip kalpui a nih avanga Monthly Fee la lo tura an ngenna ngai pawi-mawhtu zirna In te chungah MZP Hqrs. Serchhip chuan lawmthu an sawi.

Chief Minister, Zoramthanga hova nimin-a Minister, Sawrkar Official, Kohhran leh tlawmngai pawl bakah Political party aiawh thukhawm chuan lockdown thawh thumna a zawh hnuah pawh lockdown neih chhunzawm zel tha an ti a. Lockdown neih chhung tur leh a kalphung tur chu Chief Secretary kaihhruai State Executive Committee-in a la duang dawn a ni.