Mizoram tan PMGSY hnuaiah vbc. 711.43 dah
Ministry of Rural Development hnuaia Secretary, Rohit Kansal kaihhruai Empowered Committee chuan Inrinni khan sawrkar kum kal mek (2026–27) atana Pradhan Mantri Gram Sadak Yojana (PMGSY)-IV hnuaia Mizoram tana cheng vbc. 711.43 ruahmanna an thlirlet a. Rural Development Ministry hian thingtlang inkalpawhna kawng sialna tura hmalakna PMGSY-IV hnuaia ruahmanna siamte hi Kartavya Bhawan, New Delhi-a an thutkhawmna ah an sawiho a. Mihring chenna khaw kilkhawr tak tak 48 pawh tur kawng 45, a vaiin KM 509.54 sialna tur chungchang thlirin heng kawng sial turte hian a tlawhpawh tur khuate hi hmasawnna nasa tak thlen thei tura beisei a ni a. A bik hmun hla leh kilkhawr zawka awm khawmite tan malsawmna a thlen turah ngaih a ni.
Mizoram-ah chuan PMGSY hi PWD hnuaia Mizoram Rural Road Development Agency (MiRRDA)-in a thawk thin a. PMGSY hnuaia kawng sial hna hi thawh 12 thleng ruahman a ni tawh a. Mizoram chhungah hian PMGSY hnuaiah kum 2000 atang khan cheng vbc. 2,840 leh nuai 8 sanction a ni tawh a. Khaw kar kawng kilometre 4,482 chuang laih tura ruahman a ni a, a project ang zawng chuan kawng 351 laih a, a vaiin mihring chenna khaw 232 tlawh pawh tura ruahman a ni.