Serchhip District-ah ‘Swachhata Hi Seva 2026’ pualin Faina kawngah hmalak chhoh mek a ni

Rampum huap-a Faina kawnga hmalakna, ‘Swachhata Hi Seva 2026’ chu kar kalta Ningani, September 17 atang khan rampum-ah hman mek niin thla thar October 2 thleng hman a ni dawn a, Serchhip-ah pawh hmalakna tur hrang hrang duan a ni.
Swachh Bharat Mission hnuaia India rampum huap chawlhkar hnih awh Faina beihpui thlakna ‘Swachhata Hi Seva 2026’ hi Serchhip District-ah chuan Ningani kalta khan Serchhip DC Pisapui Hall-ah a hawnna hun hmangin he hun hi Bawrhsap, Paul L. Khuma chuan a hmanpui a, faina hna thawh chu rawngbawlna dik tak a nih thu sawiin, Faina chu inthununna leh mi dangte zahna (respect) lantirtu, darthlalang anga mi nihna diktak lantirtu a nih thu a sawi a, khawtlang nuam leh hrisel, tuchhuan lo awm leh zelte tan pawha ram nuam siam turin mi tinte chu thawhhona tha neih puiah sawiin, Faina atana mahni zawn theuha ke pen a, ‘collective participation’ nei turin Bawrhsap chuan mipuite a sawm a ni.

Serchhip DC Office, UD&PA leh PHE Department te bultuma hman ‘Swachhata Hi Seva 2026’ hawnna hunah hian UD&PA-a Inspector of Sanitation, Obeda Lalhuliana’n ‘Swachhata Hi Seva’ kalpui dan tur a sawi a; PHE Department atangin District Coordinator, SBM (G), Samuel Lallawmzuala hnen atangin Serchhip District-a faina kawnga hmalakna hrang hrang ngaihthlak a ni a; Serchhip Town Joint VC Chairman R. Sanghmingthanga leh Sr. EE, PHE, Isaac Lalchhuanmawia ten thu an sawi bawk a. Report-a tarlan anih danin, khaw fai inelna, Swachh Survekshan Grameen 2025 (result thar ber)-ah Serchhip District chu Mizoram-ah Pakhatna (1) a ni.

Serchhip District-a ‘Swachhata Hi Seva 2026’ hawnna neih a nih hnu Zirtawpni khan hlawhtling taka he hmalakna kalpui anih theih dan tur sawihona hi neih zui a ni a, UD&PA leh PHE Department te atanga ruahmanna an siam te ngaihthlak a nih hnuah Swachhata Hi Seva 2026 neih chhung hian Khawpui chhunga hmun bal leh bawlhhlawh paihkhawmna, kawngsir bal, tuikhur leh mipui tamna hmun (Garbage Vulnerabilty Point/Cleanliness Target Units ) thlanchhuaha tih fai a, cheibawl a, hmun nuam zawka chantir tum a ni dawn a; Thalaite faina kawnga hmahruaitu atana chherchhuah tumin Awareness Campaign te buatsaih a ni dawn bawk a, faina hna thawktu (SafaiMitra)-te hriselna leh himna ngaihpawimawh niin an pualin hriselna lam hun buatsaih sak an nih dawn bakah hnathawhna hmanrua ‘safety gear’ te pek an ni dawn bawk a; heng bakah hian bawlhhlawh atanga sum lakluh dan kawng inzirtirna te leh hman hnu hman nawn emaw, thildang tangkai atana siam dan inzirtirna te leh eizawnna leh sumdawnna a chantir dan inzirtirnate neih a ni dawn a ni.

Heng bakah hian October ni 1-ah ‘Ek Din, Ek Ghanta, Ek Saath’ tiin sawrkar Office tinah leh VC Area tinahte Faina hnatlang neih a ni dawn bawk a; October ni 2, Swachh Bharat Diwas-ah bawlhhlawh paihna hmun GVP/CTU-ah te thingphun hnatlang neih a ni bawk ang.