Monorail ruahman mekin kg 500 phur thei dawn
Mizoram Science, Technology & Innovation Council thawktute sawi danin Mualpheng rama Monorail an siam hi km 3 vela thui a ni a, hei hian Aikawn Zau-a Green House 40 vel leh a bulhnaia thlai tharte chu kawngpui ah a phur thei dawn a. Monorail kawng hi hmun thenkhatah chuan degree 45 vela awih te niin helai hmunah pawh hian harsatna awm lovin a kal thei a, khawl tihkalna atana hman petrol pawh a heh lo a. Hei bakah hian khawl pakhat chauh hmang a niin gear pahnih a nei a, pakhat chu a nawr kaltu niin pakhat dang leh chu a hnung zawnga kaltirtu niin an sawi.
MISTIC thawktute chuan tuna Monorail an buaipui mek chu Pilot Project a ni tih sawiin, a hlawhtlin chuan hmun hrang hrangah bun chhoh zel an tum tih an sawi a. Tuna an khawl bun chu Hindustan Agri Bussiness Private Limited siam a niin State sawrkar ang chuan India rama bun hmasak ber nia an hriat thu an sawi bawk a, a hming atan pawh Monorail for Agriculture tih an vuah niin Zalen an hrilh. Monorail bunna atana Mualpheng ram an thlan chhan sawiin, helai velah hian thlai chi hrang hrang, a bikin Tomato leh Hmarchapui an ching nasa a, hei mai bakah Aizawl atanga a hnaih bawk avangin enchhina atan hian an hmang niin an sawi a. Monorail chu thlai chinna hmun nghetah bun a ngai a, kum tina huan/lo neihna hmun sawn thin naah chuan tih chi a ni lo tih an sawi bawk.
Monorail chu a hlawhtlin chuan hlawkna tam tak a awm thei dawn nia sawiin MISTIC-a thawktute chuan thlai chinna hmuna thlai phurh chhuahna atana kawng laih thin hian ramngaw a tihchhiat bakah leimin a siam thin a. Hei mai bakah Fur ah kawng a nalin lirthei tan kal a buaithlak thin a, mihring tha hmanga thlai phurh hi a hautak bakah thlai a chhe duh a. Monorail ah erawh chuan senso a tlem bakah hun leh tha a heh lo a, chu bakah a hmanrua te hi thiah mai theih anih bawk avangin a awlsam zawk dawn niin an sawi. Monorail enkawl zel dan tur zawhna chhangin MISTIC thawktute chuan, “Bul kan tanpui phawt anga, a hnuah chuan Society kutah emaw kan dah ang a. Annin a enkawl hna leh tul dang an thawk ve ang,” an ti bawk.
Chief Minister Innovation Challenge siamah Department hrang hrangte ineltir an ni a, chutah chuan Department of Science & Technology pawhin project thehlutin Monorail Project hi pathumna atan thlan a ni a. Bana Kaih hnuaiah a tihtha thlanchhuahte hi project pek an niin Department of Science & Technology hnuaia MISTIC chuan hma la zuiin Mualpheng ramah hian project an siam ta a ni.